Ирандын тышкы иштер министри Мухаммед Жавад Зариф Европа мамлекеттерине Ислам республикасынын өз аскердик потенциалын бекемдөө аракетин сынга албоону эскертти.
9-июнда мамлекеттик маалымат каражаттары жазгандай, Зариф Иран менен дүйнөлүк алты державанын ортосунда түзүлгөн келишимден тышкаркы суроолор үчүн европалыктар Тегеранды сындай албастыгын айткан.
Зарифтин мындай билдирүүсү Германиянын тышкы иштер министри Хейко Маастын Тегеранга пландалган турган сапарын утурлай жасалды. Хейко Маас Иранга барып, өзөктүк куралды жайылтпоо боюнча келишимди сактап калуунун варианттарын караштырарын билдирген.
Франция, Германия, Британия АКШ 2015-жылы Иран менен жетишилген макулдашуудан чыгып кетсе да документти сактап калуунун аракетин көрүп келишет.
9-июнда Иран жаңы абадан коргонуу системасынын бет ачарын өткөрдү. Иш-чарада сөз сүйлөгөн өлкөнүн коргоо министри Амир Хатами “Иран улуттук коопсуздук кызыкчылыктарын коргоо максатында өзүнүн аскердик мүмкүнчүлүктөрүн кеңейтерин жана бул багытта эч кимден уруксат сурабай тургандыгын” билдирди.
