Президент Сооронбай Жээнбеков бүгүн, 5-апрелде Элдик апрель революциясынын 10 жылдыгын белгилөө жөнүндө жарлыкка кол койду. Бул тууралуу президенттин аппаратынын маалыматтык саясат бөлүмү кабарлады.
Жарлыкта «элибиздин мыкты уулдары 2010-жылдын 7-апрель күнү Кыргызстанда нукура демократиялык түзүлүштү орнотуш үчүн жанын берип, үй-бүлөлүк-кландык башкарууну кулатты», - деп жазылат.
Ошондой эле Апрель революциясынын мааракелик 10 жылдыгын 2020-жылы белгилөө максатында токтом чыгарылганы белгиленген.
Анын алкагында Апрель революциясынын 10 жылдыгына байланышкан иш-чаралар өткөрүлөт. Бул жарлыктын аткарылышын президенттин аппаратынын жетекчиси көзөмөлдөйт.
Уюштуруу комитетинин төрагасы болуп президенттин аппаратынын жетекчисинин биринчи орун басары Алмаз Кененбаев дайындалды. (BTo)
