Бишкек шаарындагы Дайыр Асанов атындагы эс алуу багында Экинчи Дүйнөлүк согуш учурундагы Ленинград блокадасынын 75 жылдыгына байланыштуу митинг-реквием өттү. Бул тууралуу шаар бийлигинин маалымат кызматы кабарлады.
Митинг реквиемге президенттик аппараттын башчысы Досалы Эсеналиев, Коопсуздук кеңешинин катчысы Дамир Сагынбаев, Орусиянын Кыргызстандагы элчиси Андрей Крутько, Бишкек шаардык мэриясынын жана шаардык кеңештин жетекчилери, коомдук ишмерлер, согуш ардагерлери жана калаа жетекчилиги катышты.
Жыйынга катышкан Ленинград блокадачыларынын Кыргызстандагы коомунун жетекчиси Анна Кутанова билдиргендей, учурда Бишкекте 148 согуштун ардагери болсо, алардын 11и Ленинград блокадачысы болуп саналат.
Ленинградды 1941-жылдын сентябрь айында фашисттик Германиянын армиясы курчоого алган. Шаар 1944-жылдын 27-январында гана cовет жоокерлери тарабынан бошотулган. Курчоодо калган Ленинграддан 16 миңден ашуун адам Кыргызстанга көчүрүлгөн. Алардын арасында 3,5 миң бала болгон. (ErN)