Аксы: тендердин айынан окуучуларга шашке чайы бериле элек
Бул тууралуу райондогу Кара-Суу айылындагы №46 орто мектептин мугалими, жергиликтүү кеңештин депутаты Тилеген Керимкулов “Азаттыкка” билдирди.
Маалыматка караганда, ушул жылдын 3-сентябрында шашке чайы үчүн тендер өтүп, жеңүүчүлөр тандалып алынган. Бирок азык-түлүктөр азыркыга чейин бериле элек.
- 12-сентябрда эч кандай документи жок, тендерге катышпаган адамдар мектепке азык-түлүк алып келген, бирок аны окуучулардын ден соолугу үчүн артка кайтарып жибердик, - деди Керимкулов.
Райондук билим берүү бөлүмүнүн башкы эсепчисинин орун басары Мелисбек Усупбаев тендер каражат тартыштыгына байланыштуу кеч өтүп, айрым компаниялар тарабынан тендер комиссиясына кысым болуп жаткандыктан шашке чай берүү кечикенин маалымдады.
Аксы районунун аймагындагы 57 мектепте башталгыч класстардын окуучуларына 4 айлык шашке чай үчүн 2,7 млн. сом, 12 мектепке бир маал ысык тамак үчүн 1,4 млн. сомдук тендер жарыяланган.
Дубанда жалпы 10 минден ашык окуучу шашке чайы менен камсыздалганы расмий кабарланган.
Аксы райондук билим берүү бөлүмүнүн иштен убактылуу четтетилген башчысы Угулай Зыябекованын үстүнөн Кылмыш-жаза кодексинин 304-беренесинин негизинде кылмыш иши козголуп, азыр соттун кароосунда. Зыябековага окуучулардын шашке чайына тендер өткөрүүдө өз ыйгарым укуктарынан аша чапкан деген айып коюлган. (RsK)