Көшелерге ағын су жайылған: Түркістан облысынан видео
Желіде Түркістан облысындағы алапат су ағынының видеосы пайда болды. Кадрлар 1 қазандағы нөсерден кейін тарады, деп хабарлайды Tengrinews.kz.
Әлеуметтік желіде жарияланған кадрлардан елді мекен аумағымен аққан жойқын су ағынын көруге болады. Бейнежазба Қазығұрт ауданында түсірілген болуы мүмкін. Кадр сыртындағы ер адам "көпір құлағанын" айтқан.
Түркістан облысының Төтенше жағдайлар департаменті 1 қазан күні жауған нөсер салдарынан Қазығұрт ауданының бірқатар жерлерінде жаңбыр суы жиналғанын хабарлады.
Атап айтқанда, Шарбұлақ ауылдық округіне қарасты Ақбастау ауылында су көшеге және тұрғын үйдің жертөлесіне жайылған. Оқиға орнына ТЖД мен жергілікті атқарушы органдардың күштері жұмылдырылды. Құтқарушылар 200 текше метрге жуық суды сорып шығарды, жұмыс толық аяқталған.
Бұл ретте тұрғын үйлерді су басу дерегі тіркелген жоқ, деп атап өтті өңірлік ТЖД өкілдері.
Бұдан бөлек, таулы аймақтарда жаңбыр суының төмен қарай аққаны байқалған. Су Алтын төбе ауылдық округінің Қосағаш, Қызылқия ауылдық округінің Қызылсеңгір және Тұрбат ауылдық округінің Тұрбат ауылдары маңынан аққан.
ТЖД бұл елді мекендердегі тұрғын үйлерді су басу қаупі жоқ екенін мәлімдеді.