Қазақстанда үш ірі байланыс операторына айыппұл салынды
Қостанай облысында қылмыстық-атқару жүйесі мекемелерінде тексерістен кейін үш байланыс операторы жауапқа тартылды. Аумақта мобильді байланыс сигналы рұқсат етілген деңгейден жоғары болғаны анықталды, - деп хабарлайды Tengrinews.kz.
Облыс прокуратурасы Мемлекеттік радиожиілік қызметі, ҚАЖ департаменті және байланыс операторларының өкілдерімен бірлесіп, түзеу мекемелерінің аумағындағы ұялы байланыс сигналының деңгейін тексерген.
Өлшеу нәтижесінде ҚАЖ-дың үш мекемесінде "Кар-Тел" ЖШС (Beeline), Kcell АҚ және "Мобайл Телеком-Сервис" ЖШС (ALTEL, Tele2) операторларының сигналы белгіленген шектен асып кеткені анықталған.
Прокуратураның қадағалау актісі бойынша үш оператор да Әкімшілік құқықбұзушылық туралы кодекстің 637-бабы бойынша әкімшілік жауапкершілікке тартылып, айыппұл салынды.
Қылмыстық-атқару кодексіне сәйкес байланыс операторлары түзеу мекемелерінің аумағына ұялы байланыс сигналының таралуын шектеу үшін желілерін тиісті деңгейде реттеуге міндетті.
Прокуратураның мәліметінше, бұл талаптардың орындалмауы сотталғандардың ұялы телефонды заңсыз пайдалануына жағдай жасауы мүмкін.
Бұған дейін өңірдегі ҚАЖ мекемелерінің бірінде жазасын өтеп жатқан сотталған адамның ұялы телефон арқылы алаяқтық жасағаны анықталған.
Тергеу дерегіне сәйкес, ол жәбірленушілерге 4 миллион теңгеден астам залал келтірген. Сотталған адамнан ұялы телефондар тәркіленіп, ол қылмыстық жауапкершілікке тартылған.
Прокуратура ҚАЖ мекемелерінде ұялы байланысты заңсыз пайдаланудың алдын алу бағытындағы тексерулер жалғасатынын мәлімдеді.