Каспий жағалауында екі әскери қызметшіні іздеу жұмыстары жалғасып жатыр
Маңғыстау облысында іздестіру-құтқару операциясы жалғасып жатыр. Соңғы мәліметтерге сәйкес, Каспий жағалауында әлі де екі әскери қызметші іздестіріліп жатыр, деп хабарлайды Tengrinews.kz 24KZ-ке сілтеме жасап.
Қаза тапқандардың басым бөлігі Маңғыстау облысының тумалары болған. Қазіргі уақытта қайғылы оқиғаның мән-жайын үкіметтік комиссия тергеп жатыр. Ауыр зардаптарға әкеп соққан қызметке салғырт қарау және кеме жүргізу ережелерін бұзу фактісі бойынша қылмыстық іс қозғалды.
Ведомствоаралық жедел-тергеу тобы жұмыс істеп жатыр, қажетті сараптамалар тағайындалды.
Денсаулық сақтау министрлігінің соңғы мәліметтері бойынша, құтқарылған әскери қызметшілердің бірінің жағдайы тұрақталды, өміріне қауіп төніп тұрған жоқ.
Қайғылы оқиға 24 қыркүйекте Маңғыстау облысында Әскери-теңіз күштерінің оқу-жаттығуы кезінде болды. Каспий теңізінің жағалауында оқу-жауынгерлік тапсырманы орындау барысында ауа райы күрт бұзылып, жел күшейген. Салдарынан әскери қызметшілерді теңізге ағызып әкетті. Өңірлік биліктің нақтыланған мәліметі бойынша, суда 17 адам болған: 12-сі қаза тапты, үшеуі құтқарылды, тағы екі адамды іздестіру жұмыстары жалғасып жатыр.