Көлік лизингі және АҚШ-қа тікелей рейстер. Президент бірнеше маңызды заңға қол қойды
Бүгін Президент Қасым-Жомарт Тоқаев бірнеше маңызды заңға қол қойды. Құжаттар баспасөзде жарияланады, деп хабарлайды Tengrinews.kz тілшісі Ақордаға сілтеме жасап.
Атап айтқанда, Мемлекет басшысы "Қазақстан Республикасының кейбір заңнамалық актілеріне ғылым, ғылымды қажетсінетін аумақтар, әлеуметтік қамсыздандыру, білім беру, денсаулық сақтау және әскери қызмет мәселелері бойынша өзгерістер мен толықтырулар енгізу туралы" заңға қол қойды.
Бұған дейін хабарланғандай, аталған заң ғылыми-техникалық саланы жан-жақты қолдауға және зерттеушілердің әлеуметтік кепілдіктерін нығайтуға бағытталған. Құжат ғылымды қажет ететін аумақтардың, технопарктер мен ғылыми қалашықтардың құқықтық мәртебесін бекітеді, Ұлттық ғылым академиясының жұмысын жаңғыртады және дәрі-дәрмек қолжетімділігін арттыру шараларын енгізеді.
Сондай-ақ Президент "Қазақстан Республикасының кейбір заңнамалық актілеріне машина жасауды дамыту және көлік мәселелері бойынша өзгерістер мен толықтырулар енгізу туралы" заңға қол қойды.
Құжат қазақстандық машина жасау саласының инвестициялық тартымдылығын арттыру, жаңа технологияларды енгізу, кәсіпорындардың экспорттық әлеуетін ұлғайту және өнімнің ел ішіндегі құндылығын өсіру шараларын қарастырады. Атап айтқанда, көлік құралдары мен ауыл шаруашылығы техникасын өндірушілер үшін утиль алымын төлеу бойынша өзара есепке алу тетігін енгізу ұсынылады.
Заң жеке тұлғаларға арналған лизинг шарттарын, соның ішінде лизингтік компанияларға қойылатын талаптарды және айыппұл санкцияларының мөлшеріне шектеулерді реттейді.
Түзетулердің бір бөлігі авиация саласына қатысты. Бұған дейін Сенатта талқыланғандай, өзгерістер ұлттық заңнаманы халықаралық стандарттармен және АҚШ-тың Федералдық авиация әкімшілігінің талаптарымен үйлестіруге бағытталған. Бұл Қазақстанға Халықаралық авиациялық қауіпсіздікті бағалаудан өтуге мүмкіндік береді және Қазақстан мен Америка Құрама Штаттары арасында тікелей әуе қатынасын ашу үшін қосымша жағдайлар жасайды.
Бұдан бөлек, Мемлекет басшысы "Қазақстан Республикасының кейбір заңнамалық актілеріне атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы" заңға қол қойды.
Заңдар мәтіні баспасөзде жарияланады.