Алматының тағы екі көшесінде жаңа жол таңбасы пайда болды
Алматының екі көшесінде жаңа сары түсті жол таңбасы пайда болды, деп хабарлайды Tengri Auto.
Жүргізушілер кейбір учаскелердегі қос тұтас сызықтың үйреншікті ақ түстің орнына сары түспен сызыла бастағанын байқаған. Мұндай таңбалау Жароков көшесінде және Серкебаев даңғылының әл-Фараби даңғылынан Төле би көшесіне дейінгі аралығында пайда болды.
Фото: Елена Никитенко/TengriAuto
Әкімдіктегілер сары осьтік сызық таңбалаудың тәуліктің қараңғы уақытында және қолайсыз ауа райында жақсырақ көрінуі үшін қажет екенін хабарлады. Ведомство мәліметінше, бұл қозғалыс қауіпсіздігін арттыруы тиіс.
Фото: Елена Никитенко/TengriAuto
Әкімдік мұндай шара ретсіз қойылған автокөліктер санын азайтуға және көшелердің өткізу қабілетін жақсартуға көмектеседі деп есептейді. Дәл осы учаскелердің таңдалуын көлік жүктемесінің жоғары болуымен түсіндірді.
Сонымен қатар әкімдік қазіргі уақытта сары түсті осьтік таңбаны біртіндеп басқа көшелерге де сызып жатқанын атап өтті.
Тұтас сызықты кесіп өткені үшін жаза қандай болмақ?
Жол қозғалысы ережесі тұрғысынан сары және ақ түсті тұтас жолақтардың арасында ешқандай айырмашылық жоқ. ӘҚБтК-нің 596-бабына сәйкес, оларды кесіп өткені үшін алты айға дейінгі мерзімге жүргізуші куәлігінен айыру жазасы қарастырылған.
Тұтас сызықты кесіп өткенде куәліктен айырылудан қалай құтылуға болады?
Егер сызық нашар көрінген болса - мысалы, өшіп қалған немесе қар, мұз, қоқыс басып қалса - жазаға шағымдануға болады. Сондай-ақ жолақтың МЕМСТ-қа сәйкес келмеуі де жазаның күшін жоюға себеп болуы мүмкін.
Еске сала кетейік, сары түсті таңба өткен жылдан бастап сызыла бастады. Алғаш рет сары қос тұтас сызық Назарбаев даңғылында Абай даңғылынан Қажымұқан көшесіне дейінгі аралықта байқалған болатын.
Бұған дейін біз Алматыда бірнеше көше бір жақты болатынын жазған едік.