იაპონიის პრემიერ-მინისტრმა ფუმიო კისიდამ უკრაინაში ვიზიტისას ბუჩა მოინახულა
„მსოფლიო შეძრწუნდა, როცა ერთი წლის წინ ბუჩაში უდანაშაულო სამოქალაქო პირები დახოცეს. აქ ჩადენილი ბოროტმოქმედებების გამო ძლიერ რისხვას ვგრძნობ,“ თქვა იაპონიის პრემიერ-მინისტრმა.
„მინდა იაპონიის სახელით თანაგრძნობა გამოვუხატო ყველა მსხვერპლს და დაზარალებულს. იაპონია მომავალშიც გააგრძელებს დიდ ძალისხმევას უკრაინაში მშვიდობის აღსადგენად,“ დასძინა კისიდამ.
მაისში იაპონია კისიდას მშობლიურ ქალაქში, ჰიროსიმაში, უმასპინძლებს „დიდი შვიდეულის“ სამიტს. ტოკიო მუდამ აცხადებს, რომ მხარს უჭერს უკრაინას. იაპონია შეუერთდა „დიდი შვიდეულის“ იმ ქვეყნებს, რომლებმაც გააფართოვეს რუსეთის წინააღმდეგ სანქციები.
უკრაინაში კისიდას ამჟამინდელი მოგზაურობა ბოლო მომენტამდე გასაიდუმლოებული იყო უსაფრთხოების მოსაზრებებით. როგორც Reuters-ი შენიშნავს, იაპონიის ლიდერი იშვიათად ახორციელებს გამოუცხადებელ ვიზიტებს უცხო ქვეყნებში.