ბათუმის ნავსადგურში მდგარ გემს სამართალდამცველები ამოწმებენ
„დეტალები არ ვიცი. როცა დღეს შესვენებიდან დავბრუნდი სამსახურში დღის 3 საათზე, აღარ შეგვიშვეს სხვა თანამშრომლებთან ერთად. ყველა შესასვლელი ჩაკეტილია. გვითხრეს, გემზე ვმუშაობთო. გემი გუშინ დღისით დადგა გასასვლელად, დატვირთულია, დღეს უნდა გასულიყო. სატელეფონო ზარის შემდეგ შეაჩერეს და ახლა ამოწმებენ. სატელეფონო ზარი შემოვიდა, რომ გემი როგორც კი გავა, აფეთქდებაო. ახლა გამნაღმველები მუშაობენ ადგილზე“.
პორტის კიდევ ერთი თანამშრომელო ამბობს, რომ გამნაღველებს თბილისიდან ელოდებიან, მანამდე პორტის ტერიტორიაზე შსს-ს თანამშრომლები მუშაობენ. სავარაუდო ასაფეთქებელს კი პორტის ტერიტორიაზე ეძებენ.
„ვიღაცას უთქვამს ბორანზე არის ნაღმი და რომ გავა ზღვაში, აფეთქდებაო. ეს იყო და მეტი არაფერი. არანაირი პანიკა არაა პორტში და არც პანიკის საფუძველი არაა, ჩვეულებრივად მიმდინარეობს მუშაობა პორტში“, - ამბობს ბათუმის პორტის პროფკავშირის თავმჯდომარე ამირან მიქელაძე.
უცნობია, რომელ კომპანიას ეკუთვნის გემი, რომლის სავარაუდო, მოსალოდნელი აფეთქების შესახებ პორტში სატელეფონო შეტყობინება შევიდა.
შინაგან საქმეთა სამინისტროში აცხადებენ, რომ ინფორმაციას მოგვიანებით მოგვაწვდიან. კომენტარს არ აკეთებენ საზღვაო ტრანსპორტის სააგენტოშიც.