კრიშიანის კარინიში: რუსებისთვის ვიზების გაცემის შეწყვეტის შესახებ გადაწყვეტილება ევროკავშირის დონეზე უნდა იქნას მიღებული
აუცილებელია ევროკავშირის დონეზე რუსეთის მოქალაქეებისთვის შენგენის ტურისტული ვიზების გაცემის შეწყვეტის გადაწყვეტილება, რითაც რუსეთის წინააღმდეგ სანქციები გამკაცრდება. ამის შესახებ ლატვიის პრემიერ-მინისტრმა კრიშიანის კარინიში განაცხადა.
მანამდე, ჩეხეთის საგარეო საქმეთა მინისტრმა იან ლიპავსკიმ განაცხადა, რომ ის ევროკავშირის საგარეო საქმეთა მინისტრების შეხვედრებზე შესთავაზებს რუსებისთვის ვიზების აკრძალვას აგვისტოს ბოლოს პრაღაში.
უკრაინის პრეზიდენტმა ვოლოდიმირ ზელენსკიმ The Washington Post-თან ინტერვიუში, ასევე, მოუწოდა დასავლეთს, აკრძალონ რუსეთის ყველა მოქალაქის შესვლა. მისი თქმით, ეს არის რუსეთის მიერ უკრაინის ტერიტორიების ანექსიის თავიდან აცილების ერთ-ერთი გზა.
ესტონეთმა და ფინეთმა უკვე სთხოვეს ევროკავშირის სხვა წევრ ქვეყნებს რუსებისთვის ტურისტული ვიზების გაცემის შეწყვეტა. ამ მოწოდებას შეუერთდა ლატვიის სეიმიც, რომელმაც რუსეთი ტერორიზმის მხარდამჭერ სახელმწიფოდ აღიარა.
ლატვიამ გასულ კვირას გამოაცხადა, რომ აჩერებს ვიზებს რუსეთისა და ბელორუსიის მოქალაქეებისთვის, 11 აგვისტოს კი ესტონეთმა განაცხადა, რომ აჩერებს ვიზებს რუსეთის მოქალაქეებისთვის, რამდენიმე გამონაკლისის გარდა.
ჩეხეთმა რუსეთის მოქალაქეებისთვის ვიზების გაცემა 25 თებერვალს, უკრაინაში რუსეთის შეჭრის მეორე დღესვე შეწყვიტა.
იმავდროულად, გერმანიის კანცლერმა ოლაფ შოლცმა განაცხადა, რომ ეწინააღმდეგება რუსეთის მოქალაქეებისთვის ტურისტული ვიზების გაცემის აკრძალვას.