უგულავა განმარტავს - რატომ იყრის კენჭს ფოთში ენმ-ის 5 ნომრით
21 აგვისტოს ფოთში გამართულ პრეზენტაციაზე უგულავამ განაცხადა, რომ 2021 წლის 2 ოქტომბრის არჩევნების გადამწყვეტი მნიშვნელობიდან გამომდინარე, ყოვლად უსაფუძვლოა საარჩევნო ნომერთან დაკავშირებული დისკუსია.
„ძალიან ბევრი მეკითხება ჩემს პოლიტიკურ გეგმებზე - რას აპირებ, ან რატომ მიიღე ეს გადაწყვეტილება, ან რატომ 5 ნომერი? როდესაც ჩვენ ვისაუბრეთ ჩემთან დაკავშირებით, რომ ფოთში უნდა წამოვსულიყავი, ნიკამ (მელიამ) შემომთავაზა - კი ბატონო, იქნებ, ნეიტრალური ნომერი აიღოო, რაზეც მე თვითონ ვთქვი უარი.
უარი ვთქვი იმიტომ, რომ არ არის დრო ყალბი კეკლუცობის, არ არის დრო კომპლექსების ტირაჟირების; არამედ არის ბრძოლის, ბრძოლის და მხოლოდ ბრძოლის დრო... არ არის დრო, გავარჩიოთ - ის ნომერი მინდა, ეს ნომერი მინდა... სულ ერთია.
ის ნომერი უნდა იყოს, რომელიც გამარჯვებას მოიტანს; ის ნომერი უნდა იყოს, რომელიც მოიტანს განვითარებას; ის ნომერი უნდა იყოს, რომელიც დაამარცხებს ოლიგარქიას. იქნება ეს 5 ნომერი?! იყოს 5 ნომერი. იქნება ეს სხვა ნომერი?! იყოს სხვა ნომერი“, - მიმართა გიგი უგულავამ კანდიდატად მისი წარდგენის ღონისძიებაზე ფოთში შეკრებილ მხარდამჭერებს.
მან ასევე განაცხადა, რომ 2 ოქტომბრის არჩევნები წარმოადგენს „რეფერენდუმს“, რომელში გამარჯვებისთვისაც აუცილებელია ამომრჩევლების მაქსიმალური აქტიურობა „ქართული ოცნების“ წინააღმდეგ.
„მინდა მარტივად გითხრათ - გამარჯვების ფორმულა არის: შემოხაზეთ ნებისმიერი (პარტია) 41-ის გარდა და, შესაბამისად, ჩვენ მოვიგებთ ამ რეფერენდუმს“, - განაცხადა უგულავამ.
ფოთის მერობის კანდიდატად გიგი უგულავა საზოგადოებას „ნაციონალური მოძრაობის“ თავმჯდომარემ, ნიკა მელიამ წარუდგინა.
მელიას თქმით, ვერც ბიძინა ივანიშვილი უარყოფს, რომ უგულავამ „თბილისი მნიშვნელოვნად, სასიკეთოდ წინ წასწია“ და „როგორც გაერთიანებული ოპოზიციის კანდიდატი“, უგულავა იმავეს გააკეთებს ფოთშიც.
„დავივიწყოთ ნებისმიერი პოლიტიკური პარტია. აღარაა ეს პარტიული ბრძოლა, ესაა საზოგადოების ბრძოლა. ჩვენ, როგორც საზოგადოების წევრები, ამ ბრძოლაში სხვადასხვა ამპლუით ვართ ჩაბმული“, - განაცხადა მელიამ.
გიგი უგულავამ "ევროპული საქართველო" 2020 წლის არჩევნების შემდეგ, პარტიის სხვა რამდენიმე წევრთან ერთად დატოვა. "ევროპული საქართველო" ერთ-ერთია იმ ოპოზიციურ პარტიებს შორის, რომლებიც მომავალ არჩევნებში მხარს უჭერენ საერთო კანდიდატებს.