პარტია „საქართველოსთვის“ დამფუძნებელი ყოფილი პრემიერ-მინისტრი გიორგი გახარია, ამბობს, რომ გამოხატვის უფლება კონსტიტუციით გარანტირებულია და მისი დაცვა მოქალაქებთან ერთად სახელმწიფოს ვალდებულებაა.
ასე გამოეხმაურა გიორგი გახარია „თბილისი პრაიდის“ ფარგლებში დაგეგმილი ღირსების მარშის გამართვას.
„საქართველოს ყველა მოქალაქემ და პირველ რიგში მთავრობამ უნდა დაიცვას კონსტიტუცია.მე როცა ჩემს გუნდთან ერთად ვიყავი შინაგან საქმეთა სამინისტროში. ყველაფერს ვაკეთებდით იმისთვის,რომ ნებისმიერ პირობებში ჩვენი მოქალაქეების ჯანმრთელობა , უსაფრთხოება და სიმშვიდე ამ ქვეყანაში დაგვეცვა. ეს არის უპირველესი ვალდებულება სახელმწიფოსი და სახელმწიფომ ეს ვალდებულება უნდა შეასრულოს ისე რომ ქვეყანაში სიმშვიდე კითხვის ნიშნის ქვეშ არ დადგეს“,- ეს კომენტარი გახარიამ გორში გააკეთა სადაც პარტიის ოფისი გახსნა.
გიორგი გახარია შს-მინისტრი იყო 2019 წელს, როდესაც "თბილისი პრაიდის" მიერ დაგეგმილი ღონისძიება ჩაიშალა, ამის მიზეზი გახდა ის, რომ ლგბტქი თემის წარმომადგენლებმა და მათმა მხარდამჭერებმა ვერც ერთხელ მიიღეს დასტური სამართალდამცავი უწყებიდან პრაიდის მონაწილეთა უფლებების დაცვის უზრუნველყოფაზე.
2019 წლის 8 ივლისს, მარშის გამართვის დაანონსებულ ადგილზე, შს სამინისტროსთან, დილიდან შეიკრიბნენ ჰომოფობიურად განწყობილი ჯგუფები, სასულიერო პირები და მათი თანამოაზრეები.
მოგვიანებით მათ რუსთაველის გამზირზე, პარლამენტის წინ გადაინაცვლეს და დაიკავეს ის ტერიტორია, სადაც 18 დღის განმავლობაში ანტისაოკუპაციო აქციები მიმდინარეობდა.
დემონსტრანტები მოითხოვდნენ ანტიდისკრიმინაციული კანონის გაუქმებას და რუსეთში მოქმედი გარყვნილების პროპაგანდის ამკრძალავი კანონის საქართველოში მიღებას.
სასულიერო პირები მოუწოდებნენ შსს-ს გაესუფთავებინა ტერიტორია "საშინელი ხალხისგან", რათა გადაეხადათ პარაკლისი.
წელს, შინაგან საქმეთა სამინისტროს ოფიციალური განცხადება, როგორ დაიცავს გამოხატვის თავისუფლებას, ამ დრომდე არ გაუკეთებია. არც ის არის ცნობილი, როგორ რეაგირებს სახელმწიფო საჯაროდ გაკეთებულ ძალადობრივ მოწოდებებზე.
ჰომოფობიური და რადიკალი ჯგუფები არა მხოლოდ ლგბტქ აქტივისტების, დასავლური ღირებულებების, დიპლომატიური კორპუსის და საქართველოს კონსტიტუციის წინააღმდეგ ილაშქრებენ და ინაწილებენ ადგილს რუსთაველის გამზირზე, საიდანაც ეფექტურად შეუშლიან ხელს ღირსების მარშის ჩატარებას.
"თბილისი პრაიდი" 1 ივლისიდან 5 ივლისის ჩათვლით გაიმართება - ღირსების მარში რუსთაველის გამზირზე 5 ივლისაა დაგეგმილი. 4 ივლისიდან რუსთაველის მეტროსთან გურამ და ალექსანდრე ფალავანდიშვილები გაშლიან კარავს, 5 ივლისს, დილის 10 საათიდან “Alt ინფოს” მხარდამჭერები შეიკრიბებიან ქაშუეთის უკან, 9 აპრილის ბაღში, 12 საათზე კი ლევან ვასაძე აპირებს რუსთაველის ძეგლთან გამაგრებას. თუმცა, მისი ვიდეო მიმართვის თანახმად, ჯანმრთელობის მდგომარეობის გამო, მოსკოვში იქნება. მობილიზაციას აცხადებენ და მრევლს გარეთ გამოსვლისკენ მოუწოდებენ სასულიერო პირებიც.
