ახალგაზრდებო, შეხედეთ მეგრელიშვილს და ხვიჩიას და კიდევ ერთხელ დარწმუნდებით, რომ მარიხუანას მოწევა არის მავნებელი ჯანმრთელობისთვისაც და რაც მთავარია, აზროვნებისთვისაც , – ამის შესახებ “თავისუფალი საქართველოს” ლიდერმა, კახა კუკავამ განაცხადა, რითაც გამოეხმაურა „გირჩის” ლიდერების მხრიდან ოპოზიციური პარტიების შეხვედრის დატოვებას.
მისი თქმით, ხვიჩიას და მეგრელიშვილს შეხვედრაზე ყურადღების მიქცევა სურდათ.
“ორივე მოსული იყო დაბოლილი დღეს და უნდოდათ როგორც ყოველთვის ყურადღების მიქცევა. ხან მელიას დააბრალეს, რომ “პისტოლეტით” დასდევდა და ახლა დღეს მოიგონეს მეორე სისულელე. სინამდვილეში ძალიან მარტივად იყო. ჯერ ერთი, მოვიდნენ დაუპატიჟებლად. შალვა ნათელაშვილმა ზრდილობიანად თხოვა, რომ დაეტოვებინათ დღევანდელი შეხვედრა, რის შემდეგადაც დაიწყეს პროვოკაცია, რომ ჯერ უნდა მოგვისმინოთო და მე ვუპასუხე, რომ გამოდიხართ ტელევიზიით და გვაბრალებთ, რომ მიშას თამაშს ვთამაშობთ, მაშინ, აქ რაღაზე მოდიხართქო? ამაზე ჩავარდა ხვიჩია ექსტაზში, რომ აღიარეს მიშას თამაშს თამაშობენო და ამის შემდეგ მოუწიათ სხდომის დატოვება. იაფფასიანი ტრიუკია ეს და უარესიც უქნიათ ყურადღების მისაქცევად ატოცში. ხელი არავის დაურტყამს, მაგრამ ვთხოვეთ, რომ მათი ადგილი არ იყო. შეუძლებელია, ადამიანი იყო პარლამენტშიც და ოპოზიციაშიც და მიიღო ადამიანმა გადაწყვეტილება და რაღატომ მოდიან ოპოზიციაში?, – განაცხადა კუკავამ.
ცნობისთვის, “ლეიბორისტული პარტიის“ ოფისში მიმდინარე ოპოზიციის შეხვედრა “გირჩის” წევრებმა, ვახო მეგრელიშვილმა, იაგო ხვიჩიამ და სანდრო რაქვიაშვილმა დატოვეს. “გირჩის” წევრების განცხადებით, ოპოზიციური პარტიების ლიდერებმა მათ მიერ დასმულ კითხვებზე პასუხი არ გასცეს.
