კახა კალაძე იტალიაში შეკვეთილი ნაძვის ხისა და საახალწლო ილუმინაციების სანახავად წავიდა
„კახა კალაძე აღნიშნულ ქალაქში მდებარე კომპანია IDO SRL-ის მიერ თბილისისთვის განკუთვნილი საახალწლო ილუმინაციებისა და ნაძვის
ხის დამზადების ბოლო ეტაპს გაეცნობა. კომპანია IDO SRL-მა „თბილსერვის ჯგუფის“ მიერ გამოცხადებული ტენდერები მოიგო, რომელთა ფარგლებში საახალწლოდ განათდება წმინდა გიორგის მონუმენტი, რუსთაველის გამზირი და ორბელიანის მოედანი, ასევე დაიდგმება ქალაქის მთავარი ნაძვის ხე”, - განმარტავენ თბილისის მერიაში.
2019 წელს ნაძვის ხის, გასანათებელი მოწყობილობებისა და საშობაო ნაძვის ხის ნათურების შესაძენად თბილსერვის ჯგუფის მიერ გამოცხადებულ 3 სხვადასხვა ტენდერში იტალიურმა კომპანია IDO SRL-მა გაიმარჯვა, რომლისგანაც 2018 წელს თბილისს უკვე ნაყიდი ჰქონდა 2 მილიონ ლარზე მეტის ღირებულების ნაძვის ხის ნათურები, ლამპრები და სანათი ნივთები.
იტალიური ნაძვის ხე ქალაქს 1 100 000 ლარი დაუჯდება, გასანათებელი მოწყობილობები და ელექტრონათურები - მილიონ-ნახევარზე მეტი.
გარდა იმ სამი ტენდერისა, რომელშიც უკვე გამოვლინდა გამარჯვებული იტალიური კომპანია, საახალწლო სანათებისა და დეკრაციებისთვის თბილსერვის ჯგუფს კიდევ ორი ტენდერი აქვს გამოცხადებული. ერთი მათგანი, რომელიც 467 000 ლარის ღირებულებისაა, 3D გულის, 3D ვარსკვლავის და ქუჩაში განსათავსებელი სხვა დეკორაციების შესყიდვას ისახავს მიზნად, მეორე კი - 477 000 ლარის საახალწლო გასანათებელი მოწყობილობებისა და სტრინგების.
„საერთაშორისო გამჭვირვალობა საქართველოს“ კვლევის თანახმად, 2019 წლის საახალწლო და საშობაო ღონისძიებებზე საქართველოს 5-მა თვითმმართველმა ქალაქმა, თბილისმა, ბათუმმა, ქუთაისმა, რუსთავმა და ფოთმა, ჯამში, დაახლოებით 6.5 მილიონი ლარი დახარჯა ბიუჯეტიდან. ამ თანხის 82% თბილისზე მოდიოდა.