ბასილაია: იმ ფონზე, როცა ვაჟა ექიმი ტყვეობაშია, სასამართლოს გადაწყვეტილებას არ გავასაჩივრებ

სამოქალაქო აქტივისტები გიგა მაქარაშვილი, ბექა ბასილაია და გიორგი ბუნტური, გორის წინასწარი დაკავების იზოლატორში გადაიყვანეს, სადაც თბილისის საქალაქო სასამართლოს მიერ მათ შესახებ მიღებული გადაწყვეტილების შესაბამისად, განსაზღვრულ დღეებს დაჰყოფენ.


ბასილაიას 13, მაქარაშვილს 12 და ბუნტურს 5 დღით მოუწევთ იზოლატორში ყოფნა.


ცოტა ხნის წინ ისინი ადვოკატმა თამარ თედლიაშვილმა მოინახულა. თედლიაშვილით თქმით, იზოლატორში ნორმალური პირობებია და დაკავებულები თავს ცუდად არ  გრძნობენ. გარდა ამისა, ადვოკატი მედიას ბექა ბასილაიას გზავნილსაც აცნობს.


ბასილაია სასამართლოს გადაწყვეტილების გასაჩივრებას არ აპირებს და მოსამართლის მიერ განსაზღვრულ ვადას იზოლატორში გაატარებს.


„იმ ფონზე,  როცა ვაჟა გაფრინდაშვილი სეპარატისტებს ტყვეობაში ჰყავთ გაურკვეველი დროით, ბექა ბასილაია არ აპირებს თბილისის საქალაქო სასამართლოს გადაწყვეტილება გაასაჩივროს, სასჯელის მოხდის შემდეგ კი აქციებს შეუერთდება“, - ამბობს თედლიაშვილი.


გორელი სამოქალაქო აქტივისტები დაკავებულებისთვის აგროვებენ  თანხას, პროდუქტებს და სხვა საჭირო ნივთებს. მათი თქმით, ვადის ამოწურვამდე,  საკუთარ თავზე იღებენ იზოლატორში მყოფი თანამებრძოლების საკვებით უზრუნველყოფას.


18 ნოემბერს დაკავებული 12 პირი სასამართლომ სამართალდამრღვევად ცნო სამართალდამცავი ორგანოს წარმომადგენლის კანონიერი მოთხოვნის დაუმორჩილებლობისათვის და 10 პირს ადმინისტრაციული პატიმრობა შეუფარდა (მათ შორის ბექა ბასილაიას  - 13-დღიანი ადმინისტრაციული პატიმრობა), ერთი პირი დაჯარიმდა -1000 ლარის ოდენობით, ერთ მათგანს კი მიეცა სიტყვიერი შენიშვნა.