პარლამენტის წინ "გავრილოვის პატიმრების" კარავი დაიდგა
„ეს კარავი არ დაიდგა ირაკლი ოქრუაშვილისთვის, ეს დაიდგა ყველა პოლიტპატიმრისთვის და ყველა ოპოზიციური პარტიის ვალდებულებაა, მოვიდნენ აქ და გამოხატონ პროტესტი. აქ ვიქნებით ჩვენ, ყველანი, ჩემი პარტიის წევრები. გვექნება ყოველდღიური შეხვედრები სხვადასხვა ადამიანებთან, პოლიტიკოსებთან, რათა ამ სისხლიან ხელისუფლებას შევაგნებინოთ, რომ 21-ე საუკუნეში პოლიტპატიმრები და ადამიანები, რომლებსაც ეს ქვეყანა უყვართ, არ უნდა ისჯებოდნენ“, - განაცხადა გურამ ჩალაგაშვილმა.
მისი თქმით, 20-21 ივნისის ღამის მოვლენების საქმეზე დაკავებული პირების მხარდასაჭერი კარავი „გამარჯვებული საქართველოსა“ და არასამთავრობო ორგანიზაცია „ამერიკის მხარდამჭერთა ლიგის ინიციატივით“ დაიდგა. ორგანიზატორები არ გამორიცხავენ, რომ უახლოეს მომავალში პარლამენტის შენობის მიმდებარე ტერიტორიაზე „გავრილოვის ღამის“ პატიმრების სახელობითი კარვებიც გაჩნდეს.
20-21 ივნისის საქმეზე დაკავებული 19 პირიდან პატიმრობაში ამ დრომდე რჩება 14. საქმე 225-ე მუხლის პირველი და მეორე ნაწილებით 21 პირის მიმართ აღიძრა. პროკურატურა ბრალდებულებს ჯგუფური ძალადობის ორგანიზებასა და მასში მონაწილეობაში ედავება.