Францера историн хьехархо верах лаьцна комментари йазийна нохчо терроралла къобалдарна бехкевеш ву
Расул цIе йолу Георгиевскера вахархо ву вуьйцург (цуьнан фамилии йоккхуш йац. – Билг.) – Анзоровх лаьцна йолчу видео кIелахь цо кхо эмодзи йитина боху: лом, ирх хьажийна пIелг, дог а, йаздо "Сапа Кавказ" телеграм-канало. Оцу арахецехь терроралла къобалйар гучуделира лингвистикан экспертизина, дуьйцу Baza, телеграм-канало. Расул ши шо даьлча бен карийна вац аьлла тIетуху цо.
Цунна дуьхьал бехктакхаман гIуллакх долийна, гуш-хезаш терроралла къобалдар бохучу артиклехула цунна ворхI шаре кхачалц набахтехь йаккха хан тоха мега. Оцу махкарчу МВД-н, СКР-н сайташкахь и кIант дIалацарх лаьцна хаамаш бац, йа цуьнан хьокъехь бинчу сацамах а ца дуьйцу цигахь.
47 шо долу историн а, географин а хьехархо Пати Самюэл вийра 2020-чу шеран гIадужу-беттан 16-хь. Хьехархочо ша вен масех де дуьссуш, школехь берашна дешан маршонан мах буьйцуш, довзийтина хилла Charle Hedbo журнало Мухьаммад Пайхамар аьшнашвеш дехкина суьрташ, амма аьлла хиллера, бусулба дешархой классера арадовла йиш ю, шайна и карикатураш йогIуш ца хетахь.
Патица вевзаш хилла воцу 18 шо долу Анзоров IабдуллахI хьехархо болх беш хилла йолчу колледже веара - Патина критика йеш видео гина хиллера цунна. Хьехарчуьнга собар а дина, урс тоьхна вийнера цо иза, тIаккха схьабаьккхинчу коьртана сурт а даьккхина, Макронна лерина твит хIоттийра цо. ДIалаца гIертачу юкъанна полицино вийра Анзоров. Иза Нохчийчохь дIавоьллина.
Пати Самюэль верца йоьзна резонанс гIаьттича Нохчийчоьнан куьйгалхочо Кадыров Рамзана "терроран иркархIотториг" ву аьллера Макрон, цо дешан маршо къобалъярна, иштта тIетоьхна цо, "оцу тайпа реакцин тIаьхьалонаш бохаме хила мега" аьлла. "Массо бусулбачу нехан мостагI" аьлла францхойн президентах Нохчийчоьнан муфтис Межиев Салахьа. 2021-чу шеран гезгмашин-баттахь Нохчийчоьнан парламентан спикеро Даудов Мохьмада дIахьедира, Анзоров "джихIадехь велла" аьлла.
Дайначу шарахь францхойн Ниццехь политикан тховкIело йоьхуш хилла волу Нохчийчуьрчу вахархо Абуев Iабдул-Къадир терроризмана пропаганда йарна бехке а лаьрра, набахтехь даккха шо хан тоьхна, Францехь вахар дихкина цунна. Абуевс инстаграмехь дина арахецарш хилла кхелехь материалаш, цуьнан агIонна тIевазвелла 18 эзар стаг вара.