Тарифлар буенча комитет 2025 елның июленнән тарифларга бәя арту сәбәбен аңлатты
Татарстанда 2025 елның 1 июленнән торак-коммуналь хуҗалык хезмәтләренә тарифлар үзгәрәчәк. Яңа тарифлар белән исәпләнгән түләү документларын халык 2025 елның августында июль ае өчен алачак. Бу хакта «Татар-информ»га Татарстанның Тарифлар буенча дәүләт комитеты рәисе урынбасары Сергей Павлов әйтте.
«Тарифларның еллык индексациясе илнең бөтен төбәкләрендә дә була. Тарифлар үсешенең төп факторлары – энергетика ресурсларына бәя арту (газ – 2025 елның 1 июленнән 21,3 процентка, электроэнергия – 11,6 процентка), шулай ук федераль дәрәҗәдә кабул ителгән икътисадның бюджеттан тыш секторында хезмәт өчен түләүнең минималь күләменең артуы (тармак буенча уртача хезмәт хакы - 68 мең сум), яңа объектларны эксплуатацияләү чыгымнарын исәпкә алу. Кулланучылар бәяләре индексының артуы (елына уртача 5,8 процент)», – дип аңлатты ул.
2025 елның 1 гыйнварыннан тарифлар шул килеш кала. Тарифлар бары тик 1 июльдән генә үзгәрәчәк. Яңа тарифар белән исәпләнгән түләү документларын Татарстан халкы 2025 елның августында июль ае өчен алачак.
Һәр төбәк өчен төбәк шартларын һәм үзенчәлекләре исәпкә алынган үз индексы билгеләнгән. Татарстан өчен 2025 елның 1 июленнән уртача индекс 17,5 процент дәрәҗәсендә расланган. 2025 елның 1 июленнән рөхсәт ителгән сан 4,8 процентны тәшкил итәчәк, аны аерым муниципаль берәмлекләрдә кулланырга мөмкин.