Помпео: Грција е клучен играч во Источниот Медитеран и на Балканот

Грција ја сметаме за клучен сојузник и играч во Источниот Медитеран и на Балканот, пишува во писмото испратено од американскиот државен секретар Мајк Помпео до грчкиот премиер Кирјакос Мицотакис, јави дописничката на МИА од Атина.


Американскиот државен секретар вели дека САД внимателно ги следи случувањата во регионот и истакнува дека оние кои имаат интереси во Источниот Медитеран треба да бараат решенија на мирен начин и „да се воздржат од било какво дејство или декларација што може да бидат провокативни”.


На денешниот редовен брифинг со новинарите и странските дописници портпаролот на грчката влада Стелиос Пецас рече дека писмото е одговор до сите оние кои „побрзаа да ја дискредитираат” посетата на Мицотакис на САД. Грчкиот премиер месецов беше во официјална посета на САД во чии рамки се сретна со претседателот Доналд Трамп. Помпео вели дека таа посета била јасна потврда на тесните врски и соработката меѓу двете земји.