Պատահական մարդիկ եկել են «թայֆաբազությամբ» են զբաղվում. ՍԱՊԾ ՊՈԱԿ-ի աշխատակիցները բողոքում են` իրենց անօրինական աշխատանքից ազատել են

ՀՀ ԳՆ ՍԱՊԾ «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» (ՀԱԲԼԾԿ) ՊՈԱԿ-ի 14 աշխատակից` 4 տարածքային ծառայության ղեկավար և 10 աշխատակից, օպտիմալացման անվան տակ տնօրինության կողմից անօրինական հիմքով աշխատանքից ազատվել են. այսօր հրավիրված ասուլիսին հայտարարեցին մարզային ծառայությունների ղեկավարները:

Ըստ նրանց՝ ՊՈԱԿ-ի տնօրեն Արման Գևորգյանից նոյեմբերի 5-ից ազատման հրաման են ստացել, որի տակ չեն ստորագրել և չեն էլ պատրաստվում ստորագրել:

Համայնքային անասնաբուժության ծառայության ղեկավարներն ասացին, որ դիմել են ՀՀ վարչապետ Նիկոլ Փաշինյանին, որտեղից իրենց դիմում-բողոքը վերահասցեագրել են ՍԱՊԾ-ին, մինչդեռ իրենք հենց նրանց դեմ ծառայողական քննություն էին պահանջում: Հոկտեմբերի 31-ին դիմել են նաև Վերահսկողության ծառայության պետ Դավիթ Սանասարյանին, սակայն մինչ օրս իրենց խնդիրը մնացել է անարձագանք:

Արարատի մարզային համակարգող Հովհաննես Սահակյանը նշեց, որ կառուցվածքային փոփոխություն անվան տակ իրենց անօրինական ազատել են: «Ոչ բոլորն են պատրաստ բարձրաձայնելու խնդիրը, և իրենք՝ որպես պաշտոնատար անձինք, որոշել ենք այդ բեռը վերցնել մեզ վրա և պայքարել մեր իրավունքների համար»,-ասաց նա:

Կոտայքի տարածքային կառույցի ղեկավար Արամայիս Գալստյանին ամենից շատ վրդովեցրել էր պայմանագիրը լուծարելու հրամանագիրը, ըստ որի` բացակայում է մասնագիտական պատրաստվածությունը և առաջարկում են այլ աշխատանք փնտրել:

Արամայիս Գալստյանը նշեց, որ ինքն ավարտել է Անասնաբուծական ինստիտուտը, ապա ասպիրատուրան շարունակել Լենինգրադի Անասնաբուժական ինստիտուտում, ղեկավարել է տարբեր կառույցներ, եղել գլխավոր մասնագետ: «Այս որակավորումն ինձ վրդովեցրեց, ես պետք է ինքնասիրությունս վերականգնեմ, ովքեր են ասում, որ չես համապատասխանում, նրանք, որ չեն աշխատել այդ ոլորտում»,-ասաց նա և նշեց, որ նույն ՍԱՊԾ պետը եղել է նմուշառու, հիմա աշխատում է պաշտոնյա: «Դրա համար իմ նմանները  չեն գնահատվում»,-ասաց նա:

Թալինի տարածաշրջանի կառույցի ղեկավար Կայծեր Հակոբյանին նույն հրամանագիրն էր զայրացրել: «Ցավն այն է, որ մենք ճանապարհ անցած մարդիկ ենք, գիտենք ինչ բան է համայնքային անասնաբուժությունը, պատահական մարդիկ եկել են և թայֆաբազական բաներով են զբաղվում, լավ, այդքան անգրագետ չեմ, որ հրամանիս մեջ գրել ես, որ մասնագիտական կրթությունը բացակայում է, պատկերացնում եք, չեն ուզում աշխատենք, թող ասեն՝ լավ չես կատարում լիազորություններդ, էլի ազատեք, բայց այս ձևո՞վ»,-նշեց նա և նշեց, որ ոլորտը կարգավորողների 30%-ն անասնաբույժ չէ, ֆիզիկ ու քիմիկ է: