Қытай мен Ресей АҚШ-ты санкция салғаны үшін айыптады
АҚШ Мемлекеттік департаменті 20 қыркүйекте Қытай қорғаныс министрлігінің қару-жарақ бас басқармасына Ресейдің "Рособоронэкспорт" компаниясымен қару-жарақ сатып алу туралы "ірі көлемде" келісім жасасқаны үшін санкция салған. Санкция Қытайдың былтыр Ресейден 10 Су-35 әскери ұшағын, ал биыл С-400 зенит-зымыран кешенін сатып алғанына байланысты, "Американың қарсыластарына санкция арқылы қарсы іс-қимыл жасау туралы" заңға сай салынып отыр.
Қытай Сыртқы істер министрлігінің мәлімдемесінде Вашингтонның шешімі "халықаралық қатынастардың негізгі ұстанымдарын бұзып, екіжақты қарым-қатынасқа елеулі нұқсан келтіретіні" айтылады.
Ресей Сыртқы істер министрлігі де бүгін АҚШ-тың Ресейдің 27 азаматы мен алты заңды тұлғасын "қара тізімге" енгізгеніне қатысты комментарий берді. Сыртқы істер министрінің орынбасары Сергей Рябков Вашингтонның шешімін "бос әурешілік", Ресейді өз айтқанымен жүргізу және "отпен ойнау" деп атады.
АҚШ Қаржы министрлігі 20 қыркүйекте ресейлік 33 жеке және заңды тұлғаны, оның ішінде "Вагнер" жеке әскери компаниясы мен "Оборонлогистика" компаниясын, Амурдағы Комсомольск қаласындағы ұшақ шығаратын зауытты және Ресей Бас штабы бас басқармасының бастығы мен әскери барлау қызметінің бірнеше ықтимал офицерін "қара тізімге" енгізген.