Талас: Депутаттар мэрге ишенбөөчүлүк көрсөтүүдө Куран кармабаганын айтышты
- Депутаттар үч-төрт күн мурун "19 кишини чогултуп алып Куран карматып, сессия уюштурганга даярданышкан экен" деген маалыматты мен «Азаттыкка» чыккан макаладан окудум. Туура, биз 20 депутат чогулганбыз. Куран кармоо тууралуу сөз да болгон эмес. 100% кепилдик бере алам. Бул сөз кайдан чыкканына депутаттар таң калып жатабыз. 50дөн ашып калган кишинин калп айтканы абдан туура эмес деп ойлойм. Айдар Жапарович өзү деле үч ай мурун умрага барып келди эле. Дин жөнүндө маалымат алып келген деп ойлогом.
Ал эми Талас шаарынын мэри Айдар Жузупбеков депутаттар мурунку шайлоолордо да Куран кармап сессияга кирген учурлар болгонун, кырдаал бул жолу да кайталанганын айтууда:
- "Шамал болбосо чөптүн башы кыймылдабайт" дегендей, ич арасында сөздөр болгон. Мага деле жетип атат ал сөздөр. "Куран кармайбыз, анан сессияга киребиз" дешкен. Мурунку мэр Анарбек Канатовичти шайлоодо да Куран кармашкан экен. Бири-бирине сөз берип, сессияга барабыз деп айткандарын уккам. Мен жөнү жок ойлоп чыгарган жокмун да.
Калаа башчы Айдар Жузупбековду «чарбакер» эмес деп эсептеген Талас шаардык кеңешинин депутаттары соцтармактар аркылуу элдин пикирин топтоп жатышкан. Мэр өз кезегинде депутаттардын ишин негизсиз деп сыпаттап, аларга анын кызматы керек болуп жатканын айткан эле.
Кыргызстан эгемен, демократиялык, укуктук, мамлекеттик башкарууга дин аралашпаган, унитардык, социалдык мамлекет болуп саналары баш мыйзамда жазылган. (AlS)