Бишкекте 50дөй окуучу кыз диний сабаттуулук боюнча сабак алды
Анын айтымында, бир ай бою иш жүргүзгөн лагерде Бишкек шаарынан жана аймактардан чогулган 50дөн ашык окуучу кыз диний сабаттуулук, анын ичинде куран жана араби тили боюнча сабак алышты. Алар ошондой эле 30 күн бою кол өнөрчүлүк, кулинария, чечендик өнөр, поэзия, сүрөт тартуу, аквагрим жана стол тенниси менен да алек болушту. Кыздарды диний аалымдар, дин жаатындагы жана башка тийиштүү тармактардагы адистер окутту. Бүтүрүүчүлөр соңунда атайын сертификаттарга ээ болушту.
Кыздардын баары ата-энелеринин уруксаты менен лагерге келишкен. Жатаканада жатып окугандар бир айга 6 миң сом, ал эми келип кетүүчүлөр 3 миң сом акы төлөшкөн.
“Хисса бинт Зайд” борбору бул жайкы лагерди былтыр да уюштурган эле. Мекеме эми аны жыл сайын улантууну көздөп жатат.
Кыргызстанда экстремисттик уюмдарга аялдардын тартылышы да көбөйгөнү айтылып келет. Буга байланыштуу мамлекеттик жана өкмөттүк эмес уюмдар кыз-келиндердин диний сабаттуулугун өркүндөтүү боюнча иш-аракеттерди жанданткан. (ErN)