ABŞ-da iki iranlı Tehran üçün casusluqda suçlanır

Birləşmiş Ştatlarda iki iranlı Tehran üçün casusluqda ittiham olunur. Ədliyyə Departamenti onların yəhudi obyektləri və iranlı dissident qrupu barədə informasiya topladığı bildirilir.


38 yaşlı Ahmadreza Mohammadi-Doostdar ABŞ-İran vətəndaşı, 59 yaşlı Majid Ghorbani isə Kaliforniyada yaşayan iranlıdır. Onlara ittihamlar avqustun 20-də irəli sürülüb. Hər ikisi İran adından casusluqda ittiham olunur, avqustun 9-da həbs olunublar.


İttihamnaməyə görə, Doostdar 2017-ci ilin iyulunda İrandan Birləşmiş Ştatlara gedib, məqsədi İran hökumətinin düşmənləri sayılan qurumlar barədə kəşfiyyat məlumatı toplamaq olub. İsrail və yəhudi maraqları, Mujahedeen-e Khalq dissident qrupuna bağlı adamlar hədəflər sırasında olub.


Departament bildirir ki, Doostdar 2017-ci ilin iyulunda Çikaqoda pravoslav yəhudi Rohr Chabad Evini güdüb, fotolarını çəkib.


Ghorbani isə 2017-ci il sentyabrın 20-də Mujahedeen-e Khalq-ın Nyu Yorkda keçirdiyi yürüşə qatılıb, iştirakçıların fotolarını çəkib, sonradan fotoları Doostdar-a ötürüb və 2 min dollar alıb.


İran Mujahedeen-e Khalq-ı terror qrupu sayır, Tehran hökumətini devirmək istədiyini deyir. ABŞ Dövlət Departamenti 2012-ci ilədək bu qruplaşmanı terror təşkilatı siyahısına salmışdı.