Журналистлар Мишага куртка бүләк итте

Эстафетаны үз кулларына алган каләмдәшләребез - "ТАТМЕДИА" АҖнең "Әлмәт РТВ" телерадиокомпаниясе үз чиратында Михаил Охотниковны сөендерде. 

Михаил Охотников 6 нчы төр интернат мәктәптә белем ала. Аны әбисе тәрбияли. Екатерина Абрамушкина тугызынчы дистәне ваклаган - быел 85 яшен тутыра. Тормыш авырлыкларын үз җилкәсендә күтәргән, Бөек Ватан сугышында өлкәннәр белән иңгә-иң торып, көнне төнгә ялгап эшләгән тыл каһарманы оныгын да эшкә батыр, язмыш сынауларына сабыр, нык ихтыяр көчле итеп үстергән. 

- Сугыш елларында унөч яшемнән өч ел буе ат җигеп ашлык ташыдым, аннан торфка эшкә җибәрделәр, - дип сөйләде Мишаның әбисе. - Үзем тумышым белән күршедәге Зәй районын- нан. Торфтан кайткач, иптәш кызым белән Әл- мәткә качып килдек һәм шунда төпләнеп калдык. Башта бораулау эшләре идарәсендә, аннан "Россия " кинотеатрында администратор булып эшләдем. Әлмәттә тормышка чыктым, дүрт кызыбыз дөньяга килде.

Әмма кайгы-хәсрәт сугыш елларында калмаган булып чыкты, югалту ачысы алда да көтеп тора. Абрамушкиннар гаиләсенең ике кызлары, авырып, арадан мәңгелеккә китеп бара. 

Миша - кызы Иринаның улы. Малайның әтисе дә бәхетсезлек очрагына юлыгып һәлак булган. Алай гына да түгел, Михаил үзе дә кечкенә чагында гарипләнә. 

- Әти-әнисе исән чагында да гел аның янында булдым, биш яшеннән карадым. Ятим калгач, опекага алдым. Оныгым нык тырыш, тәүфыйклы булып үсә, - дип куана әбисе. - Оекбашларын көн дә юа, чисталык ярата, булышырга атлыгып тора. Башта мәктәбенә илтә, алып кайта идем. Хәзер таяксыз йөри башлады. Үзе бара, үзе кайта.

Алар яшәгән ике бүлмәле фатир ялт иткән. Миша бүл- мәсе аның шөгыльләре хакында сөйли. Медальләренең очы- кырые күренми. Ике кубогы да бар. Дипломнары бер альбомлык җыелган. Әбисе күрсәт- мәсә, белмичә дә китә идек. Чөнки Миша бик тыйнак булып чыкты, олы бүләкләрен тизрәк бүлмәсенә кертү ягын карады. "Мактанырга яратмый", - дип өстәп куйды әбисе, оныгы өчен горурланып. Горурланырлыгы бар Екатерина Павловнаның. Оныгы әбисен өзелеп ярата, рәхмәт сүзләрен кызганмый, беренче сыйныфтан ук гел "бишле" билгеләренә генә укып сөендереп тора. Быел тугызынчы сыйныфта. Буш вакытын спортка багышлый. 

- 12 елга якын спорт белән шөгыльләнәм, - диде Миша. -  Башта хоккей, футбол уйнадым. Теннис, йөзү, авыр атлетиканы да үз итәм. Безнең тренер - Василий Архипов балалар белән теләп шөгыльләнә. 

Быел Михаил Охотников чаңгыда да оста шууын раслаган. Түбән Камада физик мөм- кинлекләре чикләнгәннәр арасында уздырылган республика ярышларында ул икенче урын алган.

Барысына да ничек өлгерә икән Миша? Югыйсә дуслары да күп, дәресләрне дә калдырмый, тырышып укый, мәктәбе дә якында түгел - Гафиятуллин урамына кадәр үк барырга ки- рәк.

Өлгерлекнең сере бик гади булып чыкты - ул вакытын компьютер артында төрле уен уйнап сарыф итеп утырмый. 

- Мин анда утырганчы тренировкага йөрим, Спорт са- раена хоккей уенын карарга барам, - диде ул.  

Михаил мәктәпне тәмамлагач политехник техникумга, аннан институтка керергә хыяллана. Исәбе - нефтьче булу. Хыялларының тормышка ашачагына шик юк. Әнә, матур курткалы булу теләге дә көтмәгәндә чынга ашты бит. "Әлмәт РТВ" телерадиокомпаниясенең әлеге бүләгенә Миша да, әбисе дә ихластан шатланды. 

"Әлмәт таңнары" игълан иткән "Сабыйга бәхет бүләк ит" хәйрия акциясе ел азагына кадәр бара. Чираттагы изгелекне "Знамя труда" газетасы күрсәтәчәк - эстафета таягы алар кулында.  

 

Ирина АПАЧАЕВА                                         

 Автор фотосы