Әти кеше яңа туган баласын мичтә яндырган, хатыны мәетен җәймәгә төреп моргка илткән
Амур өлкәсендә дүрт балалы әти кеше яңа туган сабыен мичтә яндырган, хатынын җәймәгә төреп моргка алып килгән. Бу турыда РЕН ТВ хәбәр итте.
Вакыйга 4 сентябрьдә Благовещенский районындагы Новотроицкое авылында була.
Йөклелек буенча хисапта тормаган хатын үз өендә үле бала тудыра. Баланы хатынның 43 яшьлек ире таптыра.
«Ир-ат сүзләренчә, бала үле икәнен аңлагач, ул аны үзе кремацияләгән. Ул яңа туган улының мәетен мунча мичендә бөтенләй яндырып бетергән», – дигән РЕН ТВ чыганагы.
Бала тапканнан соң хатыны аңын югалта, аннары үзе дә вафат була. Әти кеше хатынының мәетен җәймәгә төрә һәм машинасына салып, моргка алып килә.
Хәзер тикшерү эшләре бара.
Гаиләдә дүрт бала – ике кыз һәм ике малай үсә. Укытучылар аларны яхшы яктан гына сыйфатлый, диелә хәбәрдә.
«Комсомольская правда» белешмәсе буенча, Новотроицкое авылында яшәүче күп балалы гаилә үз хуҗалыгы белән яши, гаджетлар белән кулланмый. Күршеләр һәм танышлары сүзләренчә, алардан авыл халкы да, туристлар да ипи, сыр һәм сөт сатып ала. Эко-фермерлар гаиләсе башлыгы турында «Гордость России» порталында да язганнар. Алар ТВ-тапшыруларда төшә, биредә әти кеше борынгы рецепт буенча ипи пешерүләрен, бөтен тирә-якка кәҗә сөте һәм йогырт сатуларын, биредәге күлне чистартуларын сөйли.
Ир белән хатын 15 ел чамасы тату гына яши. Бишенче балаларын көтәләр, бала туган көн бәйрәм булырга тиеш була, тик фаҗигагә әверелә.
Тикшерү комитеты җинаять эше ачкан, диелә хәбәрдә.