Ульяновск өлкәсенең Уразовка татар авылы тарихына багышланган китап басылды
(Казан, 1 март, «Татар-информ»). Ульяновск өлкәсенең татар авыллары тарихына багышланган китаплар чыгу дәвам итә. Шушы көннәрдә генә тагын бер татар авылы — Карсун районы Уразовка (Сакускай) авылы хакында китап басылды.
Россия Федерациясенең атказанган мәдәният хезмәткәре Рауза Гиматдинова (Хайретдинова) тырышлыгы белән әзерләнгән җыентыкка авылның тарихы, данлыклы кешеләре, сугыш чоры һәм бүгенге тормышына кагылышлы бай мәгълүмат тупланган, дип хәбәр итә «Өмет» газетасына сылтама белән БТК матбугат хезмәте .
Китапка кергән язмалардан күренгәнчә, Уразовка авылына 1648 елда нигез салынган. Авыл халкы арасында саланың исеменә кагылышлы ике төрле риваять яши икән: авылга нигез салучы Ураза исемле булган, бәлки мөселманнарның иң зур бәйрәме Ураза белән бәйледер.
«Шундый бер урын бар… Уразовка авылы» («Есть такое место … село Уразовка») исемле китапны чыгарып, авылдашларына зур бүләк ясаулары өчен Рауза Гиматдинова, Шамил Шәмсетдинов, Разия Биккузина, Саидә Яфуняева, Фәүзия Хәйретдиновага якташлары рәхмәт сүзләрен юллыйлар, диелгән хәбәрдә.