Томск өлкәсендә югалган Ан-28 очкычы табылган
(Казан, 16 июль, «Татар-информ»). Бүген Томск өлкәсенең Бакчар районында Ан-28 пассажир самолеты юкка чыккан иде. Аның бортында 17 кеше булган. Самолет табылды, кешеләр исән-сау. Бу хакта РИА Новости агентлыгы хәбәр итә.
Томск өлкәсендә Кедровск – Томск рейсын башкарган вакытта юкка чыккан Ан-28 пассажир очкычы җиргә төшеп утырырга мәҗбүр булган. Бу хакта Гадәттән тыш хәлләр министрлыгының төбәк буенча Баш идарәсе хәбәр итә.
Гадәттән тыш хәлләр министрлыгында ачыклык кертүләренчә, һава судносында 14 пассажир, шул исәптән бер бала һәм өч экипаж әгъзасы булган. Очкыч «Себер җиңел авиация» ачык акционерлык җәмгыятенә карый. Самолет Бакчар районына кергәч авария булганын искәртә торган маяк эшли башлаган.
Һава судносын эзләү өчен Россия Гадәттән тыш хәлләр министрлыгының Ми-8 вертолеты җәлеп ителгән. Министрлыкның составында 100 кеше булган аэромобиль төркеме әзерлек хәленә китерелгән.
14.36 сәгатьтә самолет төшеп утырырга мәҗбүр булган урын табылган. Ми-8 вертолеты самолет янына төшкән. Томскидан кешеләрне эвакуацияләү өчен өстәмә вертолетлар озатылачак.