Бугун Олий хоккей лигаси (ВХЛ) - Буюк ипак йўли кубоги мунтазам чемпионатида навбатдаги ўйинлар бўлиб ўтди. "Ҳумо" жамоаси ўз майдонида Твернинг "Динамо" клубига қарши баҳс олиб борди ва 5:4 ҳисобида рақибдан устун келди. "Қанотлилар" учрашув давомида икки бор ҳисобда ортда қолганларига қарамай иродали ғалабани қўлга киритишди. Шу тариқа, биринчи конференцияда 59 очко (А дивизонда 59 очко, 5-ўрин) жамғаришга эришган Евгений Попихин шогирдлари плей-офф йўлланмасига расман эга чиқишди. Гап шундаки, "Тамбов" бугун "Ростов" билан ўйинда очко йўқотса, тошкентликлар муддатидан олдин плей-оффга чиқишар эди. Амалда ҳам шундай бўлди, "Ростов" 3:2 ҳисобида рақибидан устун келди. Эндиликда "Ҳумо"нинг энг яқин таъқибчилари бўлмиш "Тамбов" ҳамда "Динамо Тверь" олдинда турган барча беллашувларда ғалаба қозониб, "қанотлилар" мағлуб бўлган тақдирда улар очколар сони бўйича бизникиларга етиб олиш имкониятига эгалар. Аммо асосий вақтдаги ғалабалар сони эвазига Евгений Попихин шогирдлари рақиблардан олдинда туради. 5 февраль ўзбек хоккейи тарихидан жой олди. Бугунги ўйинда илк бор мухлислар майдонга ўйинчоқлар улоқтириш маросимида иштирок этишди. Мазкур юмшоқ ўйинчоқлар онкологик касалликдан азият чекувчи болаларга ва меҳрибонлик уйларига тақдим этилади. Бундан ташқари, Тошкентнинг "Ҳумо" хоккей клуби Олий Хоккей лигаси (ВХЛ) плей-офф босқичига чиқди. Хоккейчилар шанба куни сафар ўйинлари серияси учун Нижний Новгородга йўл олишади. У ерда 10 февраль куни "Торпедо-Горький" "Ҳумо"ни қабул қилади. Баҳс Тошкент вақти билан соат 15:00 да старт олади.
