Россиянинг Оренбург области Соль-Илецк шаҳар округи судига Ўзбекистоннинг 31 ёшли фуқаросига нисбатан қўзғатилган жиноий иш келиб тушди. Ўзбекистонлик тақиқловга қарамай, област ҳудудига ноқонуний киришда айбланмоқда. Прокуратурада маълум қилинишича, ўзбекистонлик Россия ҳудудидан миграция қонунчилигини бузгани учун 2 йил аввал чиқариб юборилган. Унга яқин 5 йил ичида Россияга қайта кириш тақиқлаб қўйилган. Бир ой аввал ўзбекистонлик Россияга поездда йўл олиб, чегара кесиб ўтилгандан кейин ҳаракатланаётган поезддан сакраган. Бироқ чегарачилар уни Чашкан посёлкасига кетаётганда ушлаб олишган. Ўзбекистонлик айбини тўлиқ тан олган. Унга нисбатан жиноий иш қўзғатилган. У 4 йиллик мажбурий ишлар ёки озодликдан маҳрум қилиниш билан жазоланиши мумкин. Шунингдек, жазо варианти сифатида 300 минг рублгача жарима тайинланиши мумкин.
