Мир хуват уӆты айӆат ёх уйтантопса
Курк тыӆащ хащам хатӆ эӆты ай кер тыӆащ ӆапатмет хатӆ унты Сочи вошан ун уйтантопса ус. Уӆты мувев арсыр щуңат эӆты хус щёрас моӆтаскем айӆат ёх тохи ёхтыӆыйс. Ханты мирэв хуӆам хоятан этаӆтаса. Ямал мувев альты харан вуӆы хот ӆонщман ус. Щита Овс мув шимӆаң мир хоятат департамент эӆты Лидия Кельчина па мойң хоятата нётты хоят Варвара Сермер рупитсаңан. Алексей Конев па уйтантопсая вохам хоята ус, кум шиттаӆ порайн эвеңаӆаӆа нётты ёхтыӆыйс. Ар мир хоятат йи номас понман, йи вер верман, сыстам туром иӆпийн уӆты ӆаңхаӆайт. Хор: Лидия Кельчина. «Мин Лидия Геннадьевна пиӆан ханты сохан усман. Мойң хоятат пиӆан ханты, рущ па английской ясаңан потартсаман. Хотэв вантты па ханты уӆапса эӆты хуӆантты шеңк ар хоят Индия, Бразилия, Китай, Исландия, Тунис, Аргентина, Германия, Молдавия, Беларусь, Казахстан, Армения, Африка муват па па мув хоятат ёхтыӆысат. Мир ӆоват уятты кинайн рупитты па каш верты хоятат хота па ӆоңтысат. Вуӆы сох вощхиман, сак лопсат, ернасӆув, хот ӆыпи пормасат вантыман, ёшан верам рупатайт хоятат шеңк умащӆысат. Моӆты порайн Овс мувева ёхтыӆыты номас понтсат. Хоӆна ма ханты ясаңан ханшам па Овс мув хорамат щуртам открыткайт верӆам. Почта хуват мойӆапса ясаң китман ма верам ханты открыткайӆам ар муват пеӆа лакки китсайт. Кашң муван, кашң вошан ханты ясңев ат уятӆа. Шоши мувем эӆты мойң хоятата потартман ма яӆпа, мет такан уӆты мувем па ханты хоятӆам самема мосмитсат. Ӆыпеман кашң хатӆ амтатӆысам, уйтантопсайн ар мир хоятат йи номас понман, йи вер верман, сыстам туром иӆпийн уӆты ӆаңхаӆайт, уӆты хоятат йи рут иты уӆтыя», — Варвара ястас. Зоя Куртямова ханшам потар