Azerbaijan Airlines (AZAL) авиакомпаниясе Баку–Казан–Баку маршруты буенча рейсларны «очышларның куркынычсызлыгын тәэмин итү өчен» билгесез вакытка туктата, дип яза РИА Новости компаниянең матбугат хезмәтенә сылтама белән.
Хәбәрдә күрсәтелгәнчә, авиакомпания мондый карарны Казан өстендәге һава киңлегенең вакыт-вакыт ябылуы белән бәйле рәвештә кабул иткән.
Әлеге юнәлешкә билет алган пассажирлар штрафларсыз акчаларын тулысынча кайтаруны рәсмиләштерә яки юнәлешен үзгәртә ала.
Исегезгә төшерәбез, чәршәмбе көнне Azerbaijan Airlines авиакомпаниясе Бакудан Казанга очарга тиешле авиарейсны гамәлдән чыгарды. Компания матбугат хезмәтендә белдерүләренчә, карар «Келәм» планы аркасында Казан өстендәге һава киңлегенең ябылуына бәйле рәвештә кабул ителгән.
