Россия төбәкләрендә татар мирасын саклау һәм популярлаштыру чаралары кысаларында, Татарстан Республикасы Мәгариф һәм фән министрлыгы һәм Бөтендөнья татар конгрессы 2024 елда Новосибирск өлкәсендәге татар теле укытыла торган мәктәпләргә уку әсбаплары тапшырган.
Новосибирск өлкәсенең Татар милли-мәдәни автономиясе Татарстанның Мәгариф һәм фән министрлыгына һәм Бөтендөнья татар конгрессы башкарма комитетына әлеге бүләкләр өчен рәхмәт әйтә. Бу хакта өлкәнең Татар мәдәнияте үзәгенең «ВКонтакте» төркемендә хәбәр итәләр.
Мондый хезмәттәшлек татар мәдәниятен сакларга һәм үстерергә, шулай ук милләтара тынычлыкны һәм дуслыкны ныгытырга булыша, диелә хәбәрдә.
Новосибирск өлкәсенең Татар милли-мәдәни автономиясе аларны гасырлар дәвамында татарлар яшәгән авылларның мәктәпләренә җибәрүне оештырган.
Казаннан җибәрелгән уку әсбаплары арасында – дөньякүләмендә билгеле сынлы сәнгать әсәрләренең фотокүчермәләре һәм татар теле алфавиты плакатлары бар. Күрсәтмә материалларны укыту барышында кулланачаклар, бу кече яшьтәге укучыларга танышырга, ә олы укучыларга татар халкы мәдәниятен тирәнрәк аңларга булышачак, диелә хәбәрдә.
