Бүген Казанда төрле мәйданчыкларда күп кенә бушлай бәйрәм чаралары оештырыла. Татарстан Рәисе Рөстәм Миңнеханов телеграм-каналында 2 гыйнварда шәһәрдә кая барырга һәм вакытны ничек күңелле итеп үткәрергә икәнлеге хакында сөйләде.
Әйтик, «Казан» Гаилә үзәге янәшәсендәге төп чыршы янында 17.00 сәгатьтә «Бременские музыканты» спектакле була, шулай ук диджейлар чыгышы, аудиовизуаль инсталляция планлаштырылган. «Черек күл» паркы исә теләгән һәркемне киномарафонга чакыра.
15.00-18.00 сәгатьләрдә «Салават күпере»ндә һәм Серов бульварында Санкт-Петербургның «Вокруг» урам театры үз номерларын тәкъдим итә.
Казан Кремлендә дә зур программа оештырыла: Губерна канцеляриясе бинасында «Сундук Абики», «Окно в прошлое» спектакльләрен, 16.00 сәгатьтә шунда ук «Сон Дедушки Мороза» спектаклен, Туп сараенда «Добрые интерактивы» программасын, «Как Иван-Пушкарь Новый год спасал» музыкаль-театральләштерелгән спектаклен тамаша кылырга мөмкин. Шәһәр урамында казанлылар һәм кунаклар «Елан сәяхәте» DJ-фургоны белән очраша ала.
«Казанда 30 яңа ел мәйданчыгында 100дән артык күңел ачу чарасы планлаштырылган! Кайбер шугалаклар бүген эшләмәсә дә, кар бабайлар ясарга, чаңгы-чанада шуарга була. Ә сез кайларда булырга өлгердегез? Кая барырга киңәш итәсез?» - дип кызыксынды Рөстәм Миңнеханов.
