31 декабрьдән 1 гыйнварга каршы төндә Казандагы һава торышында капма-каршылыклар күзәтеләчәк. Көндез җылытканнан соң кичкә таба суытачак, юлларда бозлавык барлыкка килергә мөмкин. КФУ профессоры, география фәннәре докторы Юрий Переведенцев «Татар-информ» агентлыгына шулай дип белдерде.
«Көнбатышта – антициклон, югары басым өлкәсе, көнчыгышта һәм Себердә – циклон, Баренц диңгезе үзәгендә – тирән циклон, Керчь бугазында Балкан циклоны күзәтелә, ә без – юл чатында. Яңа ел төнендә һава торышы капма-каршылыкларга бай булачак. Җылы фронт узганнан соң без күпмедер вакытка Төньяк Атлантикадан килгән циклонның җылы секторында калабыз, шуннан соң салкын фронт килә. Без циклонның тылдагы өлеше йогынтысында булачакбыз, һава массалары төньяктан киләчәк», - дип ачыклык кертте ул.
Россия Гидрометеоүзәге фаразлавынча, 31 декабрьдә Казан территориясе аша җылы атмосфера фронты уза. Көндез шәһәрдә һава температурасы 0..+1 градус тәшкил итәчәк, карлы яңгыр яварга мөмкин. Әмма төштән соң температура акрынлап түбәнәя башлый, 1 гыйнварга каршы төндә термометрның терекөмеш баганасы -5..-6 градуска кадәр төшәчәк. 1 гыйнварда шәһәрдә һава температурасы -3 градус тирәсе тәшкил итәр дип көтелә.
