Яңа ел алдыннан 63, 64, 69 нчы микрорайоннар халкы өчен мөһим вакыйга булды. Биредә медицина офисы ачылды. Анда 7нче поликлиника табиблары халыкка хезмәт күрсәтәчәк. Бу хакта «Шәһри Чаллы» сайтында Зөлфия Галим яза.
Тантаналаы чарада Чаллы мэры Наил Мәһдиев, Россия Дәүләт Думасы депутаты Әлфия Когогина, Татарстан сәламәтлек саклау министры Марсель Миңнуллин катнашты.
63, 64, 69нчы микрорайоннарда бүгенге көндә 8500 кеше яши. Яңа офиста дүрт терапия участогы булдырылды. Аны 6га җиткерү планлаштырыла. Шулай ук биредә ашыгыч ярдәм күрсәтү, процедура бүлмәләре эшли. Офисның гомуми мәйданы 429 кв. м.
Участок табибы профилактик караулар, диспансеризация үткәрә, ашыгыч ярдәм күрсәтә. Офиста моның өчен барлык җиһазлар да бар. Яңа сәламәтлек саклу үзәге сменага 60 кешене кабул итә ала.
7нче поликлиниканың баш табибы Рөстәм Ханов әйтүенчә, коллектив тупланган инде.
Мәртәбәле кунаклар капиталь ремонт тәмамланган 4нче балалар поликлиникасының филиалы белән дә танышты.
Чаллы мэры Наил Мәһдиев табиблар белән сөйләште. Аларны якынлашып килүче яңа ел белән котлап, изге теләкләрен җиткерде.
