Бүген Татарстан Дәүләт Советы Рәисе Фәрит Мөхәммәтшин 22 җәмәгать судьясына таныклык тапшырды.
Парламент җитәкчесе җыелучыларны җаваплы вазифага сайланулары белән котлады һәм республика җәмәгать судьялыгының законлылыкны тәэмин итү буенча гаять зур эш башкаруын әйтте.
«Барлыкка килү һәм үсеш елларында бөтендөнья юстициясе гадел хөкем итүнең ышанычлы инструментына әверелде. Җәмәгать юстициясе гомуми юрисдикция судларына караган барлык бәхәсләрнең 80 процентка якынын карый. Агымдагы елның беренче яртыеллыгында гына да республиканың җәмәгать судьялары тарафыннан 420 меңнән артык эш һәм материал каралды», - дип сөйләде Фәрит Мөхәммәтшин.
Аның сүзләренчә, гадел хөкем итүнең мөһим шартлары булып заман таләпләренә җавап бирә торган матди-техник тәэмин итү тора. «Татарстан Республикасында юстицияне үстерү» республика программасын гамәлгә ашыруга ел саен республика бюджетыннан 800 млн сумнан артык акча бүленә. 2022-2024 елларда Казан, Алабуга, Чистай, Азнакай, Мамадыш шәһәрләрендә җәмәгать судьялары биналарында капиталь ремонт эшләре төгәлләнде. 8 объектта агымдагы ремонт ясалган.
Парламент Рәисе фикеренчә, аерылышу белән бәйле эшләрне карау аерым игътибар таләп итә. «Татарстанда аерылышулар саны 7 процентка кимесә дә, бу мәсьәлә борчу тудыра», – диде Мөхәммәтшин.
Республика Югары Суды рәисе Азат Гыйльметдинов һәм Татарстан юстиция министры Рөстәм Заһидуллин җәмәгать судьяларына һөнәри эшчәнлекләрендә уңышлар теләде.
«Сез катлаулы сайлап алуны уздыгыз һәм үзегезнең югары профессиональлегегезне исбатладыгыз. Барыгызга да дөрес, законлы һәм, иң мөһиме, гадел карарлар телим. Һәр эш, материал, карарның кешеләрнең язмышын хәл иткәнен һәрвакыт истә тотыгыз», - диде Гыйльметдинов.
Казан шәһәренең Яңа Савин суд районы буенча 4нче суд участогы җәмәгать судьясы Марат Ибраһимов хезмәттәшләре исеменнән, ышаныч өчен, рәхмәт белдерде һәм җәмәгать судьялары гадел хөкем эшен вакытында һәм гадел алып барачакларына ышандырды.
«Татарстанда дәүләт хакимиятенең югары закон чыгару органында җәмәгать судьяларына таныклыклар тапшыру тантанасы күркәм традициягә әверелде. Юстиция министрлыгы суд җәмәгатьчелеге белән тыгыз хезмәттәшлек итә, җәмәгать судьялары эшчәнлеген тәэмин итә. Сезнең белән без төп бурычыбызны − үз мәнфәгатьләрен һәм хокукларын яклау өчен җәмәгать судьяларына мөрәҗәгать итүче республика халкы өчен уңайлы шартлар тудыруны хәл итәбез. Сезгә карар кабул итүдә ныклык һәм принципиальлек телим», – диде Рөстәм Заһидуллин.
