Түбән Новгородның Уразавылы мәдәният йортында өлкәнең өлкән яшьтәге татар авыллары вәкилләре арасында «Минем ягымлы әбием» II өлкәара конкурсы булып узды. Аны Краснооктябрьск округы хакимияте ярдәме белән Түбән Новгород татарлары конгрессы оештырды. Бу хакта Бөтендөнья татар конгрессы матбугат хезмәте хәбәр итә.
Иҗади бәйгедә Уразавыл, Суыксу, Пашат, Татар Моклокасы һәм Сафаҗай конкурсантлары катнашты. Аларның чыгышын татар иҗтимагый оешмалары һәм учреждениеләре вәкилләреннән, шулай ук Татарстан Республикасы артистларыннан торган компетентлы жюри бәяләде.
Конкурста Сафаҗайдан Шамилә Айнетдинова җиңде. Моннан берничә ел элек ул «Нижгарбикә» бәйгесендә дә иң яхшысы булды.
Чара тәмамланганнан соң сәхнәдә махсус хәрби операция ихтыяҗларына гуманитар ярдәм җыюда актив катнашучы округ волонтерларын хөрмәтләделәр. Уразавылда бәйрәм көне Татарстан артистлары концерты белән тәмамланды.
