Бүген ТР Дәүләт Советы Рәисе Фәрит Мөхәммәтшин җиденче чакырылыш республика парламентының алтынчы утырышында бу елда депутатлар тарафыннан башкарылган эшкә нәтиҗә ясаячак. Сессиянең көн тәртибенә барлыгы 24 мәсьәлә кертелгән, шуларның җидесе – республика закон проектлары – беренче укылышта каралачак.
Депутатлар төбәк инвестиция проектларын гамәлгә ашырганда салым салу мәсьәләләрен җайга салу; салым салуның гадиләштерелгән системасын кулланучы салым түләүчеләр өчен салым ставкалары билгеләү; хайваннарга карата мөнәсәбәт өлкәсендә аерым мәсьәләләрне җайга салу турындагы законнарга, шулай ук ТР Җир кодексына үзгәрешләр кертә торган канун проектлары хакында фикер алышачак.
Моннан тыш, парламентарийлар Казан илкүләм тикшеренү технология университетының «Өстенлек-2030» программасы турындагы хисабын һәм республикада гражданнарның сәламәтлеге торышы хакындагы докладын тыңлаячак.
Көн тәртибенә шулай ук Дәүләт Советының Икътисад, инвестицияләр һәм эшкуарлык комитеты составын үзгәртү хакындагы мәсьәлә дә кертелгән. Бу Чистай сайлау округында 1 декабрьдә узган җиденче чакырылыш ТР Дәүләт Советы депутатын сайлау белән бәйле. Парламентка әлеге комитетта эшләргә теләк белдергән «Чистополье» компаниясе генераль директоры Наил Залаков сайланды.
«Хөкүмәт сәгате» вакытында депутатларга республикада миграция сәясәте өлкәсендә башкарыла торган эш турында мәгълүмат тәкъдим ителәчәк.
