Республика Рәисе Рөстәм Миңнеханов җитәкчелегендәге Татарстанның Инвестицион советы бүген 93 миллиард сумлык тугыз яңа проектны хуплады. ТР Инвестицион үсеш агентлыгы башлыгы Талия Миңнуллина журналистларга шулай дип белдерде.
«Бу республикада 2,5 меңнән артык эш урыны дигән сүз. Проектлар да, аларның әзерлек дәрәҗәсе дә төрле. Алар буенча сораулар булса да, тулаем алганда барысы да хупланган», - дип өстәде Миңнуллина.
Казанда гамәлгә ашырылачак 67 миллиард сумлык «Зур Идел» мега-паркы иң масштаблы проект булды. Казанда ләм күлләрен рекультивацияләү белән шөгыльләнә торган «Ядран-строй» компаниясе әлеге участокта төзекләндерелгән яр буе булдырырга ниятли. Биредә эшлекле конгресс-үзәк, күңел ачу паркы, кунакханә һәм апартаментлар, шулай ук спорт инфраструктурасы (мототранспорт өчен трек һәм төрле спорт мәйданчыклары) барлыкка киләчәк.
Фото: © ТР Инвестицион үсеш агентлыгы эскизы
«Проект бик зур. Төрле мәсьәләләрне исәпкә алырга кирәк. Шәһәр янында Идел буенда мондый мәйданчык юк. Аны дөрес планлаштыру, концепцияне гамәлгә ашыруга җентекле якын килү зарур», - дип искәртте Миңнеханов.
Татарстан башкаласында гамәлгә ашырылачак тагын бер проект – 7,1 миллиард сумлык премиаль дәрәҗәдәге кунакханә комплексы. Яңа кунакханә шәһәр үзәгендә калкып чыгачак.
Тагын өч проект Чаллыда урнашыр дип көлә. Алар - автотранспорт чаралары, шулай ук тагылмалар һәм ярымтагылмалар өчен кузовлар җитештерү, балалар тернәкләндерү үзәге һәм гепарин эшләп чыгару (елына 2 тонна) буенча заманча җитештерү комплексы.
Моннан тыш, Татарстанның Лениногорск һәм Тукай районнарында калдыклар эшкәртү буенча комплекслар барлыкка киләчәк, аларның гомуми бәясе 7,2 миллиард сум тәшкил итә. Тукай районында шулай ук кондитер фабрикасы төзергә ниятлиләр, биредә елына 40 мең тонна продукция җитештереләчәк.
Соңгы проект республиканың Питрәч районында төзелеш кораллары җитештерүгә бәйле. Биредә бетон, кафель һәм пыяла бораулары, герметик өчен пистолетлар, канцелярия өчен лезвиеләр һ.б. төзелеш кораллары эшләп чыгарырга җыеналар.
