Бөтенроссия татар журналистлары форумы ачылышында Түбән Новгород өлкәсенең Сергачтагы «Татар радиосы» баш мөхәррире Фәрит Аймалетдинов җирле иҗтимагый оешмалар белән актив эшләүләре турында сөйләде. Форумны Бөтендөнья татар конгрессы «Татмедиа» Республика матбугат һәм массакүләм коммуникацияләр агентлыгы белән берлектә оештыра.
«Халык санын алу нәтиҗәләре буенча, безнең төбәктә 26 мең татар бар. Түбән Новгород өлкәсендә 34 татар авылы, барысында да радио, телевидение эшли. Түбән Новгород татарлары Мәскәүдә дә, Санкт-Петербургта да яши, аларга интернет аша эфирны таратабыз. Иҗтимагый оешмаларга килгәндә, шөкер Аллаһка, бөтенебез талашып беттек! Сигез иҗтимагый оешма, ике көрәш федерациясе бар. Татар халкы һәм көрәшчеләре кими, ләкин иҗтимагый оешмалар арта. Без алар белән яхшы эшлибез, соңгы арада алар активлашты», - диде ул форумда.
Фәрит Аймалетдинов бүгенге көндә Сергачтагы «Татар радиосы»нда иҗтимагый оешмаларга 8 640 секунд эфир бирелгәнлеген, 25 920 секунд әлеге тапшырулар кабатлап чыкканлыгын әйтте. «Иҗтимагый оешмаларга бу гына аз, аларның көн саен эфирга чыгасылары килә. Шулай булгач, мин аларга «Вершки и корешки» мультфильмын карарга кушам. Аннары алар эфир таләп итүдән туктый, атнасына дүрт тапкыр да җитә», - дип, уены-чыны белән сөйләде ул.
«Иҗтимагый оешмаларга ярдәм итәбез, мәсәлән, Сабантуй оештырганда реклама әзерлибез, акча сорамыйбыз. Радиоканалыбыз эшли, бүгенге көндә аны Чувашия Республикасының бер өлешендә һәм Мордовиядә дә тыңлыйлар. Безнең төп бурычыбыз – Түбән Новгород өлкәсендә яшәүчеләргә татар мохитен тудыру. Бөтендөнья татар конгрессы белән без тыгыз хезмәттәшлек итәбез. Килегез, үзебездә көтеп калабыз, - диде «Татар радиосы» баш мөхәррире.
