А.В.Баталов исемендәге Бөгелмә дәүләт рус драма театрының элеккеге директоры мошенниклыкта шикләнелә. Бу хакта ТР прокуратурасы матбугат хезмәте хәбәр итә.
Күзәтчелек ведомствосы мәгълүматлары буенча, элеккеге директор эшкә хезмәткәрләр алу турында боерыклар чыгарган, әмма чынлыкта әлеге кешеләр хезмәт вазифаларын башкармаган. Хезмәт хакларын исә җитәкче үзенә алып барган һәм үз ихтыяҗларына тоткан. Шул рәвешле, прокуратура мәгълүматлары буенча, театр директоры 250 мең сум акча урлаган.
«Алдан тикшерү органнары күзәтчелек ведомствосы тикшерү материаллары буенча театрның элеккеге директорына карата җинаять эше ачты», - диделәр прокуратурада.
