2024 елның беренче яртыеллыгында Татарстан предприятиеләре һәм оешмалары хезмәткәрләренең реаль хезмәт хакы, кече эшмәкәрлек субъектларын да кертеп, 2023 елның шул ук чоры белән чагыштырганда 10,4 процентка арткан. Бу Татарстанстат республиканың социаль-икътисади үсеше турында әзерләгән докладтан билгеле булды.
Гыйнвар-июнь айларында уртача номиналь хезмәт хакы 69431,9 сум тәшкил иткән. Ул узган елның беренче 6 ае белән чагыштырганда 19,0 процентка арткан, дип белдергән иде Росстат.
Шул ук вакытта июньдә татарстанлыларның реаль хезмәт хакы узган елга караганда 8,5 процентка, ә узган ай белән чагыштырганда 0,4 процентка арткан.
Үз чиратында, июнь аенда республика халкының номиналь хезмәт хакы узган ел белән чагыштырганда 17,7 процентка һәм узган айга караганда 1,0 процентка күтәрелгән.
2024 елның беренче яртыеллыгында татарстанлыларның реаль акча керемнәре узган ел белән чагыштырганда 9,8 процентка, ә реаль булган акча керемнәре 8,7 процентка арткан.
Шул ук вакытта Татарстан агымдагы елда Россиянең югары керемле төбәкләре арасында 14 урынны алды.
