«Гадел Россия – Дөреслек өчен» партиясе лидеры Сергей Миронов, Дәүләт Думасы мәгариф комитеты рәисенең беренче урынбасары Яна Лантратова һәм СРЗП фракциясенең башка депутатлары Дәүләт Думасына 5-9 сыйныф укучыларын түләүсез кайнар туклану белән тәэмин итү турында закон проектын кертәчәк. Документ «РИА Новости» карамагында бар, дип яза басма.
«РИА Новости»га партиянең матбугат хезмәтендә хәбәр итүләренчә, закон проекты пәнҗешәмбе Дәүләт Думасына карауга кертеләчәк.
«Проект... дәүләт һәм муниципаль белем бирү оешмаларында төп гомуми һәм урта гомуми белем бирү программалары буенча укучыларны бер тапкыр түләүсез кайнар туклану белән тәэмин итү максатыннан эшләнгән», - дип хәбәр ителә аңлатма язуында.
Закон проекты авторлары фикеренчә, балаларга мәктәптә чакта кайнар ризык ашату аларның сәламәтлеген һәм нәтиҗәле белем алуга сәләтен саклау өчен мөһим шартларның берсе булып тора. Укытучылар һәм табибларның күпьеллык күзәтүләре тәҗрибәсе күрсәткәнчә, уку көне дәвамында кайнар ризык ашамаган укучылар тизрәк арый, баш авыртуга, арыганлыкка, ашказаны авыртуына, начар кәефкә һәм эшкә сәләтлелеге түбән булуга ешрак зарлана.
«Бүгенге көндә мәктәпләрдә түләүсез кайнар туклану белән башлангыч мәктәп укучылары тәэмин ителә. Без бу программаны «урта звено»га да кагылырлык итеп киңәйтергә тәкъдим итәбез. Балаларның мәктәптә озак вакыт үткәрүен һәм аларга артык зур йөкләнеш булуны исәпкә алып, 5-9 сыйныф укучыларын түләүсез кайнар туклану белән тәэмин итәргә кирәк (аларның гаиләләренең керемнәренә бәйсез рәвештә). Программаны гамәлгә ашыруны илебезнең киләчәк буынына инвестиция буларак кабул итәргә тәкъдим итәм», - дип хәбәр итте «РИА Новости»га партия лидеры Сергей Миронов.
Ул шулай ук билгеләп үткәнчә, кешенең балачакта алган туклану гадәтләре гомерлеккә саклана, һәм мәктәп ашханәсе – ул үсеп килүче кеше сәламәт яки сәламәт булмаган туклануга ияләшә торган урыннарның берсе.
