Казаннан Курск өлкәсенә чираттагы гуманитар йөк партиясе җибәрелде. Ярдәм составына азык-төлек продуктлары, шәхси гигиена чаралары һәм зыян күргән ватандашларыбыз өчен барлык кирәкле әйберләр керде.
Фото: © «Татар-информ», Дмитрий Шатров
«35 тонна гуманитар йөк төялгән ике фура җибәрәбез. Анда индивидуаль азык-төлек җыелмалары, шәхси гигиена чаралары һәм зыян күргән кешеләргә кирәкле бөтен нәрсә бар. Без җибәргән бар нәрсә Курск өлкәсе хөкүмәте белән килештерелгән. Без беренче ел гына гуманитар ярдәм күрсәтмибез, шуңа күрә зыян күрүчеләргә нәрсә кирәклеген инде беләбез», - дип сөйләде «Ярдәм янәшә!» республика хәрәкәте җитәкчесе урынбасары Анна Мөбәрәкшина.
Аның сүзләренчә, йөк җыюда Татарстанның барлык иҗтимагый оешмалары, битараф булмаган халкы, предприятиеләре, бизнес-структуралары, республика хөкүмәте ярдәм иткән. Бөтен Татарстан берләште һәм хәленнән килгәнчә ярдәм күрсәтә.
«Бу инде өченче тапкыр ярдәм җибәрү. Күпме кирәк, шулкадәр ярдәм итәргә планлаштырабыз», - диде ул.