Татарстан Республикасы Дәүләт җыр һәм бию ансамбленең 88 нче иҗат сезоны зур тамаша белән ачылды. Коллективның яңа сезон башлану уңаеннан ике зур концерты Казан Кремле территориясендә ачык һавада узды.
«Ике көн дәвамында Дәүләт җыр һәм бию ансамбле казанлыларны һәм шәһәр кунакларын ике программа белән сөендерде», дип хәбәр итә ансамбльнең матбугат үзәге.
Беренче көнне коллектив «Алтын фонд»тан тарихны колачлаган, фольклорга нигезләнгән номерлар тәкъдим итсә, икенче көнне «Зөбәрҗәт» татар лирик җырлары, «Весялуха» белорус биюе, «Субботеи» рус халык җыры, шулай ук Себер татарлары фольклоры белән таныштыручы «Тыпырдау» һәм «Себерче» хореографик номерлары кергән «Без бергә!» программасын күрсәткән.
«Шушы көннәрдә без Мәскәүдә Татарстан мәдәнияте көннәрендә катнаштык. Хәзер яңа сезон премьераларына актив әзерлекне башлыйбыз. Декабрьдә тамашачыларга «Җиде энҗе» этно-мюзиклының яңа версиясен тәкъдим итәчәкбез», ди коллективның сәнгать җитәкчесе, Татарстанның халык артисты Айрат Хәмитов.
Сентябрьдә коллектив Казахстанга оча, анда «Бөтендөнья күчмә халыклары уеннары» этник спорт төрләре буенча халыкара спорт ярышларында катнаша.
26 сентябрьдә Уфада «Бию – халыкның җаны» хореография сәнгате фестивале кысаларында Татарстан Республикасы Дәүләт җыр һәм бию ансамбле Фәйзи Гаскәров исемендәге дәүләт академия халык биюләре ансамбле белән бер сәхнәдә чыгыш ясаячак. Дәүләт ансамбле тамашачыга «Алтын фонд»тан иң яхшы номерларын тәкъдим итәчәк.
Октябрь аенда Татарстан Республикасы Дәүләт җыр һәм бию ансамбле Казанда БРИКС саммитының мәдәни чараларында катнашачак.