Авыл хуҗалыгы министрлыгы 2024 елда Россиядә ашлык уңышы буенча фаразны 132 миллион тонна дәрәҗәсендә һәм агымдагы авыл хуҗалыгы елында экспорт буенча фаразны 60 миллион тонна дәрәҗәсендә саклап калды, дип хәбәр итте журналистларга министрлык башлыгы Оксана Лут. Бу хакта «РИА Новости» яза.
«Начар һава торышын үттек кебек, барлыгы 1,1 миллион гектар (чәчүлекләр-ред.) юк булды. Уңдырышлылык буенча да яхшы гына бардык. Әмма хәзер Уралны су баса, анда урып-җыю эше авыр бара. Анда ашлык үсеп чыккан инде – дөрес, бераз гына, әмма авыр. Көньякта – корылык. Шуңа күрә әлегә 132 миллион тонна итеп тотабыз. Аны киметү ягына да, арттыру ягына да үзгәртергә нигез юк. Әлегә шулай торабыз», - диде Лут, 2024 елда ашлык җыю буенча фараз турындагы сорауга җавап биреп.
Ул билгеләп үткәнчә, юк булган 1,1 миллион гектар мәйданның 26 проценты гына иминиятләштерелгән булган. «Безгә иминиятләштерү буенча өстәмә эш башкарырга кирәк, нәкъ менә мәгърифәтчелек эше. Чөнки барысы да урысча «авось»ка өметләнә, безгә эләкмәс әле, ди. Ә бу ел барысына да эләгүне күрсәтте, була ала торган бөтен нәрсә булды», - дип белдерде министр.
Аның сүзләренчә, иминиятчеләр инде 1,1 миллиард сумны кайтарган. «2,5 миллиард сумга кадәр тагын түләргә тиешләр, әмма түләү уңыш җыеп алганнан соң булачак, чөнки анда мультикуркынычлы иминиятләштерү программасы, бер гектардан күпме алганны караячаклар, зыянга төгәл бәя бирәчәкләр», - дип аңлатты Лут.
Ул шулай ук агымдагы авыл хуҗалыгы елында Россиядән ашлык экспортлау (1 июльдә башланды) буенча фаразны раслады. «Ашлык җыеп алу буенча 132 миллион тонна фаразлануыннан чыгып, без бу сезонда экспорт буенча 60 миллион тонна фаразлыйбыз», - диде авыл хуҗалыгы министрлыгы башлыгы.