Нурлатта берничә ир-егет, РФ Саклану министрлыгы белән контракт төзеп, Казандагы җыелма пунктка юл тотты һәм шуннан махсус хәрби операция зонасына китте. Агымдагы атнада Нурлат хәрби комиссариатыннан министрлык белән контракт имзалаган уннан артык кешене махсус хәрби операция зонасына озаттылар. Алар арасында нурлатлылар да, Россиянең Томск, Иркутск, Свердловск, Ульяновск һ.б. өлкәләрендә яшәүчеләр дә бар.
Бүген иртән сигез контрактник Нурлаттан махсус операция зонасына китте, алар арасында Иркутск өлкәсеннән Алексей һәм Александр да бар иде. Алар Нурлатны контракт имзалау өчен тикмәгә генә сайламаган.
«Махсус операциягә китү турындагы карарны абыем шунда һәлак булганнан соң кабул иттем. Мин неофашистларны җиңү өчен аның эшен дәвам итәргә тиеш. Безнең өлкәдәге хәрби комиссариатларга шалтыраттым, әмма беркайда да аңлаешлы җавап алмадым. Башка контрактниклар белән сөйләшкәч, документлар рәсмиләштерү өчен ун көн, хәтта ике атна вакыт китүен белдем. Танышымның киңәше белән Татарстан хәрби комиссариатының кайнар линиясенә мөрәҗәгать иттем һәм бирегә, сезнең шәһәргә килдем. Нибары өч-дүрт сәгать эчендә медкомиссия уздык, хәрби комиссариат хезмәткәрләре бик компетентлы, барысын да тиз рәсмиләштерделәр», - дип белдерде 32 яшьлек Алексей.
«Сез – чын геройлар, чөнки катлаулы чорда кыю адым ясап, туган ил сагына бастыгыз. Хәрби комиссар буларак уяулыкны югалтмаска, үзеңне сакларга һәм куелган хәрби бурычларны төгәл үтәргә чакырам», - диде район хәрби комиссары Заһир Абдуллин.
1 августтан Татарстанда РФ Саклану министрлыгы белән контракт төзүче гражданнарга 1,7 миллион сумга якын акча бирелә.
РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: (843) 221-44-52. Моннан тыш, 8 800 222 59 00 номеры буенча мөрәҗәгать итәргә була.